Alex Mendizabal musikari atipikoa da. Musikariari gaur egun eskatzen zaizkion musikaz kanpoko zereginei iskin egiten die. Entzuten dakien musikaria da, ez du diskorik argitaratzen, kontzertuak bizikleta gainean egiten ditu, ur azpian, kontzertuak irakurri eta idatzi egiten ditu, operetak egiten ditu, Londresen zenbait musikal egin zituen iaz, formazio musikal akademiko sakona badu ere, eta pop taldetan musikari profesional gisa aritu bada ere, bere lekua hortik at dago. Aspaldiko laguna dugu, miresmen osoa diogu eta burutik ez zitzaigun inoiz pasatuko musika enlatatua gorroto duen musikari bati Kafea eta Galletak bezalako disko-forum batera gonbidatzea. Berak, ordea, aurrea hartu zigun, eta bere burua proposatu zuenean eskema guztiak birrindu zizkigun (ta gu pozik).
Urteak dira Alex Erroman bizi dela, eta otsailaren 4ko saiorako, inoiz argitaratu ez diren bere grabaketen aukeraketa bat egin eta entzunaldi komentatua egitera etorriko zaigu. Baina ez dezagun eskema gehiegirik egin, Alexek hautsa balira bezala egingo baitie putz.