Egun, Arrasate, Gasteiz eta Bergarako bost lagunek osatzen dute Ain_1, besteak beste, bi gitarra, biolina, kaxa flamenkoa, poesia eta dantza garaikidea uztartzen dituen proiektu berezia. 2009an baliabide eskasekin eta esperimentu gisa, Gure abestia iristen den lekuetaraino maketa grabatu zuten. Orain, salto kualitatiboa eman dute estudioko lehen lana kaleratuz: Musika kaxa (MusikHerria), non, aipaturiko tresnen nahastetik, flamenko, bossa zein bestelako doinu anitzak ditugun gozagai. 

Musika kaxaren barruko hotsa
Leku ez diren lekuak, pertsonon konplexutasunak, harremanetan naufrago izatea, saminak sortzen dituen beharrak, mozorrotuta beldur direnak, maitasun arnasaren epeltasuna eta bestelako gaiak aurkituko ditugu musika kaxaren barruan. Esan daiteke boskoteak barrenak hustu dituela lan honekin. Eta horretarako poesia darabilte, hitzek garrantzia izan dutelako hastapenetik Ain_1 egitasmoan. Hala, taldekide guztiek kolaboratu dute ahotsetan, norberak bere musika tresnak maitasunez jotzeaz gain. Eta, ezin ulertu Ain_1 dantza eta ikus-entzunezko gabe, Ain_1 musikatik harago doan lagun taldea delako. Orain musika kaxa gorri-gorria zabaldu dute eta soinua egiten hasi da...

Oharra: Entzun! liburutik (61. zenbakia) hartua