Orain dela hamar urte hasitako ibilbide apartekoan beste maila bat gora egin du Lambchop taldeak. Is a woman biluziaren ondoren, Awcmon eta Noyoucmon batera argitaratutako bi disko berriek Nashville hiriko taldearen soinua berreskuratzen dute bere distira osoan.

Euskal Herriko hardcorearen aitzindariak izan ziren Bap!! taldekoak. Baina ez hori bakarrik; abiadari eta indarrari muzin egin barik, bilakaera eredugarria izan zuten eta euren bigarren etapan bi disko izugarri utzi zizkiguten. Taldea unerik gozoenean zegoenean desagertu zen, baina orain albiste dira berriro, Metak-ek Bazen izeneko DVD bat argitaratu baitu: talde erraldoi honetaz berriro mintzatzeko aukera bikaina.

Udaberrian Bartzelonan eta Madrilen izango direla aitzaki, musika elektronikoaren gainean eragin handiena isuri duen taldearengana hurbiltzea proposatzen dizugu. Onar dezagun, ia ezer ez litzateke gauza bera izango Kraftwerk existitu izan ez balitz.

Gauzak okertzen ez badira, aldizkari hau argitaratzen denerako kalean egongo da Atom Rhumbaren laugarren lan luzea, Backbone ritmo izenekoa. Guk diskoa entzuteko zoria izan dugu, eta esan dezakegu inolako beldurrik gabe taldeak berriro ere gainditu dituela marka guztiak. Eta ez zen batere erraza, Chasin´ the onagro aurreko lanak oso altu jarri baitzuen langa. Baina Atom Rhumbak gelditu ezineko abiada darabil, beti ere bi oinarri dituela: erritmoarekiko zaletasuna eta etengabeko bilaketa.