Reggaea dute oinarri nagusia Ke No Falte eta Gobeo Bay. Lehenengoak nahiko ezagunak egin ziren joan den mendeko 90eko hamarkadaren bigarren erdian. Bi disko eta ehunka zuzeneko eman zituzten. Santutxuko taldeak 1999an eman zuen azken kontzertua.
Urte asko eta askoren ondoren, berriz itzuli dira, Vente conmigo izeneko disko berriarekin, non fusioa oso nabaria den (samba, pop, rock...) eta gaztelaniaz interpretatua dagoen.
Taldeko bizkarrezurra osatzen zuten jatorrizko bi kiderekin itzuli da Ke No Falte: Jose (ahotsa eta gitarra) eta Axier (baxua).

Izena berria bada ere, gaur eta hemen mintzagai ditugun taldeen artean, edo hobe, musikarien artean beteranoenak ditugu Gobeo Bay-en aritzen direnak. Izan ere, Potato eta ondoren Arawak taldeetako Okiman eta Trepi aritzen dira Gobeo Bay taldean. Iaz jarri zuten talde hau ibilian eta disko bikoitz batekin debutatu dute: Alfa y Omega. Lehenegoan taldearen abestiak daude (gaztelaniaz kantatuak) eta bigarrenean Roberto Sánchez ekoizlearen dub bertsioak. 



En Tol Sarmiento Arabako Errioxatik datoz Azkeneko taldea Euskal Herrian publiko gazteenaren artean modan jarri den "skacore" estiloaren barruan sartuko dugu. Ez dakigu etiketa hau egokiena den, baina bai ulertzeko erraza: skaren "ebakiak" rock eta punkarekin nahasten direnean eta erritmo bizian jotzen denean sortzen den musika da. Vendetta, Ze Esatek!, Hesian, Skakeitan, Betagarri eta holako taldeekin parekatzen ahal ditugu. Euskaraz eta gazteleraz kantatzen dute eta Hacia la luna euren bigarren diskoa da. Guztiz festazalea.
.