Disorders 2003an sortu zen Zaldibarren. Hasieran bost lagunek osatzen zuten taldea (bateria, baxua, bi gitarra eta abeslaria), baina ondoren txalaparta jotzeko bi lagun batu zitzaizkien taldera. Emaitza, punk-rock eta hardcore doinu oldarkor eta bizkorretik haratagoko soinu originala lortzea. Esan daiteke taldea bere heldutasunera iritsi zela iazko udan Hitzak (autoekoizpena) estudioko bigarren lana kaleratzean, baina taldekideek azkenaldian nabaritu duten nekeagatik taldea desegitea erabaki dute, nahiz eta onartu pena ematen diela.
 
Zazpikoteak agur esateko bi kontzertu antolatu ditu. Bata, pasa den irailaren 16an Never Surrender eta Doktors Klub taldeekin batera Durangoko Plateruena Kafe Antzokian eskainitakoa. Bestea, larunbat honetan Zaldibarko gaztetxearen ondoan dagoen futbol zelai zaharrean ezarriko duten karpan egingo dutena. Kontzertuan Disorders taldea ariko da soilik, baina kontzertu luzea izango da. Izan ere, kaleratu dituzten bi diskoetako ia abesti guztiak, grabatu gabeko zenbait abesti zahar eta bertsio batzuk ere joko dituzte. Eta noski, horrelakoetan gertatu ohi bezala, hamaika kolaborazio izango dituzte emanaldian zehar. Eta ez dira ere sorpresak faltako.