Uztailaren 2an eta 3an burutuko dira Azpeitian Euskal sortzaileen arteko I. topaketak. Ahotseneak azaldu digunez, hauxe da topaketon helburua: "Euskal sortzaileok elkar ezagutu, euskal sorkuntzaren egungo egoera elkarrekin aztertu eta balizko irtenbideak proposatzea. Euskal sortzaileak gara. Eta euskal diogu euskaraz sortzen dugulako. Politika egiteko kultura berria aldarrikatzen den sasoiotan, kultura politika berriak eskatzera gatoz, Euskal Herriak ez baitu gaurdaino ezagutu bere kultura jaso, gorde, maitatu eta transmisioaren bitartez
biziraupena bermatzeko ganorazko ahaleginik erakunde publiko edota alderdi politikoengandik. Kultura ezinbestekoa dugula onartzen dugu euskal herritarrok. Gutxik ukatuko dute pertsonak kulturaduna izan behar duela nor izateko.


Aldarrikapen politiko zein sozialetan parte hartzeko deitzen gaituzte sortzaileok, bestela aspergarriak liratekeen ekitaldietan gure kantuak, gure bertsoak, gure hitzak, gure keinuak, gure irudiak ezinbestekoak omen zaizkie, sarritan betelanerako edo iluna dena edertzeko badira ere".


Eta segitzen dute azalpenarekin: 
"Herritarrak garelako egingo dugu bat aldarrikapen batzuekin, sortzaileak garen einean besterekin. Baina eraginkorrak izango diren kultura politikak hausnartu, eztabaidatu eta adosterakoan, gutaz ahaztu egiten dira edo gutxi batzuk, ezertarako balio ez duten foroetara deitzen gaituzte. Eta egin ditzakegun ekarpenak euren interes elektoralistetan baliagarriak badira, euren
burutaziotzat plazaratzen dituzte. Kultura, hain gutxi euskarazkoa, ez da izan, orain arte, ezelango ordezkaritza politikoren lehentasun. Euskal sortzaileok erabakiguneak behar ditugu. Kultura-politikak, euskalgintzak eta euskal kulturako hartzaile, sortzaile zein eragileok eztabaidatu, adostu eta gauzatu behar ditugu. Eta inork ez digunez antzeko aukerarik eskeintzen, guk geuk sortuko dizkiogu aukerak euskal kulturari".