Psycho edota The Witch abestiak zuzenean entzuteko aukera izanen dugu The Sonics taldearen eskutik heldu den maiatzaren 31n Bilboko Sanata 27 aretoan. Garaje punk eta rock and rollaren maitaleak pozik egon daitezke, nahiz eta halako itzulerek beti eragiten duten zalantza logikoa: zer nolako emaitza izanen duten eszenatokiaren gainean, alegia. Halere, Money (That's what I want) edota Louie Louie bikaintasunez bertsioneatu zituen taldea gure artean izatea notizia ezin hobea da (jada sekulako ikusmina sortu du zaleen artean).

----------------------------------------

The Sonics Tacoman (Washington) sortu ziren 1963 urtean The Kingsmen eta Wailers-en arrakastak eragindako olatuaren baitan. Jatorrizko taldekideak hauek izan ziren: Gerry Roslie (abeslaria eta pianoa/organoa), Andy Parypa (baxua), Larry Parypa (gitarra), Bob Bennett (danborrak) eta Rob Lind (saxoa).
Beren kantuak zikinak eta ilunak ziren eta terroreaz edota desamodioaz mintzo ziren gehien bat.