Itziarren Semeak-ek lau abestiko lan berria argitaratu du, Gau luzeak kantaren bideoklipa ere dakarrena. Bizkaitarrek adierazi dutenez, “Basque of Brixton, 2011ko maiatzean kaleratutako Lehen lerroan diskoaren jarraipena da". Gainera, irailaz geroztik, taldekide berri bat gehitu da egitasmora, Bilbomatiks-etik Asier Markez heldu baita teklatua astintzeko, eta musikalki aurrerapausoa eman dute, soinu berriak gehituz.



Izenburuak The Clash taldearen Guns of Brixton ezagunari egiten dio erreferentzia, "Bizkaiko golfoek" beren nortasun propioarekin moldatu duten arren. Portadarako erabili duten argazkiak irudikatzen du diska laburrean aurki daitekeena. "Euskaldunak, Brixtongo beltzak bezala, baztertuak, zapalduak izan dira, baina harro jarraitzen dute borrokan. Aldi berean, 80. hamarkadako krisi ekonomikoa eta langileen kaleratzeak gaur egungo egoerarekin alderatzen ditu aukeratu duten lokalizazioak", diote.

Baina Basque of Brixton askoz gehiago da. Sarekada ezberdinetan gatibu eramandako ehunka gazteen aldeko aldarria da, kalean egindako lanarengatik preso dituzten lagunentzako elkartasun oihua eta baita ere gaztetxeen aldeko ereserkia. Izan ere, EP berria kaleratzearen ideia 7katu gaztetxearen bosgarren urteurrena dela-eta egindako kanta grabatzera joan behar zutela sortu zen.
Oraingoan ere hainbat bidailagun izan dituzte alboan. Ainhoa Mendibilek (Hankahutsik) ahotsa eta hitzak egin ditu Aulki hutsak kantuan.
Bizitzaz bi hitz Eneko Ostolaza Ikaran (Oliba Gorriak) euskal preso politikoak idatzitako testuan oinarrituta dago eta Evaristok (La Polla) ahotsa sartu du. 7Katu kantan Pirritx eta Porrotx pailazoen eta Iñaki Martinezen trikia lagun izan dituzte, hitzak Oihana Bartra bertsolariak egin dituelarik.