Lur gorrian barrena lanean, haurrentzako kanta tradizionalak bildu eta doinu propioak jarriz osatu du disko jostaria Xabi Strubellek, gitarra akustikoaz eta musika tresna gutxi batzuez lagunduta. Abestien abiapuntu gisa, hainbat ipuin entzuteko aukera ere ematen du diskoak.
Eneko Haritzak sortu ditu ipuin horiek eta diskoarekin batera datorren liburuan jaso ditu, Strubellen jatorrizko ideian oinarrituta. Hala, Euskal Herriko hiru animalia gorriren abenturak kontatu dizkigu; alegia, katagorri baten, mantangorri baten eta txantxangorri batenak. Gainera, haurrek marrazkiak koloreztatu ahal izango dituzte. Ilustrazioa Yoana Figuerasek egin du.