Bilbon jaio zen, 1958an. Oso gazte zelarik hasi zen musikaren mundura hurbiltzen, eta talde batean ere aritu zen bolada labur batez. Gaztetan, Zientzia Ekonomikoak ikasi zituen Sarrikon, eta aseguru-etxe batean ere aritu zen, baina irratigintza zen bere zaletasunik handiena, eta 1977an Radio Juventuden hasi zen lanean. Handik “Chivato” gidara eta Muskaria aldizkarira igaro zen. 1983an “Alguien te está escuchando” izeneko irratsaioa egiten hasi zen Radio Euskadin. Aipatutako irratsaioa euskal irratigintza musikalaren klasiko bilakatuko zen. Egin egunkariko “Bat, bi, hiru” gehigarria sortzen ere lagundu zuen. Irratsaioa eta gehigarria Rock Radikal Vasco (RRV) izeneko musika mugimenduaren zutabeetako bi izan ziren. Pablo Cabezaren izena Euskal Herriak 80ko hamarkadan bizi izan zuen musika-eztanda paregabe harekin lotuta egongo da beti, baina ez da atzera begira geratzen diren horietakoa. Harrez geroztik, Pablo Cabezak oso gertutik bizi izan du azken hogei urteotan euskal musikak izan duen bilakaera, irratian zein komunikabide idatzietan (gaur egun Gara egunkariaren Gazte Algara gehigarrian eta Radio Euskadin kolaboratzen).

Anari Alberdi (Azkoitia, Gipuzkoa, 1970) Filologia Erromanikoan lizentziatua da. Haurtzaroan solfeo eta piano ikasi bazuen ere, akademikoa baino gehiago pasionala deritzo musikarekin duen harremanari. 80ko hamarkadako euskal pop taldeak entzuten hasi zen (Itoiz, Jotakie, La Insidia, 23 Ojos de Pez...), geroago talde ingelesak (Psychodelic Furs, The Smiths, Everything But The Girl...), eta bateria jotzen hastearekin batera Atlantiko ozeanoaz bestaldeko artistak ezagutu zituen (Nick Cave, Tom Waits, Giant Sand, Will Oldham, Beasts of Bourbon...). Azken horiek dira gerora kantugile gisa gehien eragin diotenak. “Eraginak subkontzientean daude, bizitzan egiten dituzun beste mila gauza bezala”