Udaberrian Kontinente Zaharrean izango dugun Clem Snidek Entzun!-i eskainitako elkarrizketa esklusibo batean, AC/DCk bere bizitzan izan duen eragina eta XXI. mendeko musikarien erronka handien inguruan izan da mintzagai.

Zure izen artistikoa, Clem Snide alegia, William Burroughs idazle amerikarraren eleberrietako pertsonaia da. Haren lanaren jarraitzailea al zara?
Izen hori oso gaztea nintzenean aukeratu nuen. Orduan oso gertutik jarraitzen nuen beatnick mugimendu ero hori. Taldeari izen hori ematea pentsatu nuenean ez nizkion buelta gehiegi eman, honen doinua eta letren konbinazioa gustatu zitzaidan. Inoiz ez nuen imajinatuko egunen batean hau Bilboko kazetari bati esplikatuko nionik, hori ziur!

Zein izan zen zure musikarekiko lehen kontaktua?
1983an AC/DCk kaleratutako Back in Black diskoak rock and rollean aritzera bultzatu ninduen.

Zein izan da zure orain arteko lorpen adierazgarriena?
Industria honetan bizirik irauteaz harro nago eta album onak egin ditudala uste dut. Dena den, nahiago dut etorkizunera begira egotea. Esanak esan, bi ume ere baditut!

Tel Aviven, Israelen, jaioa zarelarik, arazorik sortu al du horrek artista izaterako orduan?
Ez. New Jersey-n hazi nintzen eta ez dut Israelekiko konexio handirik. Diasporako judutar bat naiz, inoiz inongoa sentitu ez dena; ez guztiz amerikarra eta ezta guztiz israeldarra ere. Artista batentzat hori dela hoberena uste dut.

Hungry Bird, zure azken diskoa, otsailaren 24an plazaratu duzu. Nola deskribatuko zenuke lana zure beste albumekin alderatuta?
Hungry Bird oso zaila izan zen ni eta nire taldearentzat; urte batzuetan zehar banatuta egon ginen. Albuma epikoa eta handia izan zedin nahi nuen, Dark Side of the Moon [Pink Floyd, 1973] edo In the Aeroplane Over the Sea [Neutral Milk Hotel, 1998] bezala. Diskoa umeentzako musikaz beteta izatea nahi genuen, baina apokalipsiaren ondoreneko kutsuarekin.

Zeintzuk izan dira zure musikan gehien eragin duten artistek?
Abestiak idazten hasi nintzenean Hank Williams, Neil Young, Daniel Johnston eta Tom Waitsengan aurkitu nuen inspirazioa.

Zeintzuk dira etorkizunerako bistan dituzun proiektuak?
Album berri bat egiten hastea gustatuko litzaidake; abesti berri asko ditut. Horretaz gain, ez dut plan espezifiko handirik.

Zer esango zenuke dela erronka handiena XXI. mendeko musikariarentzat?
Ez dut uste orain desberdina denik. Zure ama eta neskalaguna hunkitzeaz gain beste jendea ere hunkitzen duen musika egiten baduzu eta urte bat edo biren bitartean ezeren truke lan egiteko prest bazaude, musikan aritzeko aukerak izango dituzu. Irekia izaten saiatzen naiz, idazten eta tourrak egiten jarraitzen dut baina inoiz ez dakizu; batzutan goi-goian zaude eta beste batzutan, berriz, behean.

Publikoak abestiak internetetik doan jaisteko aukera izan beharko lukeela uste duzu, egun egiten den bezala?
Uste dut musika internetetik jaisteak disko konpainiei batez ere egiten diela kalte. Musikariak, hori dela eta, tourrak egitera behartuta gaude, hori baita dirua egiteko daukagun era bakarra