Ona! Durangoko azokan jende ugarik ezagutu gintuen, Ahotseneako ikuskizunaren ondoren jende gehiago interesatu da gugan. Askok ikusmiraz irekitzen zuten gutun-azala eta esan daiteke jendeak gustuko izan duela.

Eta zuzenekoetan, publikoak egiten al du twist-ik? Badago gurean dantzarako ohiturarik, edo, esan eta uste dugun bezain hotzak gara euskaldunok?

Esan daiteke, orokorrean, jendearen erantzuna nahiko hantzekoa izaten dela kontzertuetan: hasieran eszenatokitik aurpegi arraroak ikusi ohi ditugu, esango balute bezala “Eta hau zer da? Gustuko dut? Ez dakit ba ...”. Baina kontzertua aurrera doan heinean, publikoak dantzan amaitzen du, irribarrez, arazo guztiak ahantzi balitu bezala.

Zuzenekoak Dragoi Bolak marrazki bizidun ospetsuen abestiarekin amaitzen dituzue. 80. hamarkadatik ezin ihesi zabiltzate, edo?

Dudarik gabe!!!

Beharbada azkarregi da galdetzeko, baina disko bakarra argitaratuko duen egitasmoa zarete, edota Anai-Arrebak taldeak izango du jarraipenik? Hau da, etorkizunerako zer asmo?

Bada otsailaren 14an maitasunaren eguna izanik Maite zaitut, ez!! abestiaren bideoklipa estreinatu genuen, eta aurrera begira kontzertuak emateko asmoa dugu. Urrian disko berria aterako dugu, eta gaur egun buru-belarri proiektu horretan lanean gabiltza. Beraz zalantzarik gabe oraindik leku asko ditugu dantzan jartzeko.

Amaitzeko, aukeratu edozein garaitako disko bat eta adierazi hitz gutxitan zergatik gomendatzen diozun Entzun!-eko irakurleei.

1989an argitaratutako M-ak taldearen Barkatu Ama diskoa. Bere garaian behar zuen oihartzuna lortu ez arren, gure garairaino iristea lortu du. Esan dezakegu disko aurrerakoia izan zela, 2012. urtean egonda, gu harritzea lortu baitu.