entzun.com

Musika albisteak
eta agenda astero
zure postontzian!


| Sindikatu - RSS | Testu tamaina AAA

Elkarrizketak

bidali zure elkarrizketak Bidali zure elkarrizketak
Xabier Doncel 2005-02-04

ETEN ertzaren ertzean

Eten Eten
Triangelu ekilateroak hiru alde ditu, hiru angelu, eta hirurak berdinak. Horren antza hartu izan diot beti hirukote musikalei: perfekziora hurbiltzen den elementu sinpleena. Bilboko Itsasadarreko Ezkerraldeko Eten hirukoteak ertzean jartzen ditu sentimenduak bere diskoan, zuzenean sentsazio hori areagotu baino ez delarik egiten.
Nola definitzen duzue zuen musika?

Norberak bere musika definitzea zaila izaten da. Gure influentzien artean musika estilo ezberdinak daude, baina punk jarrera dugula uste dut. Guretzako rocka eta punkaren arteko ezberdintasuna hori baino ez da, jarrera. Ezkerraldean punk musika egitea Eskorbutoren bertsioak egitea da, eta gu ez gatoz horrekin bat. Etiketa bat jartzea zaila da halere, niri ere aldizkari batean ezagutzen ez dudan talde bati buruz irakurtzerakoan gustatzen zait etiketa bat jartzea, beharrezkoa ikusten dut, baina gero entzuterakoan bat etor naiteke edo ez. Guztiz subjektiboa da. Hori bai, zeozer ezberdina topatzen saiatu gara beti, ez dut pentsatzen rocka edo punka den, ezta publikoak zer sentituko duen, nik publikoan egonda zer sentituko nukeen baizik, ikusle bezala sortuko zizkidan sentsazioak.

Agian horregatik Berara, Nafarroara, joan zarete grabatzera, bertan Bizkaian baino hobeto ulertzen zaituztelako?

Bertan lagun pila bat dugu aspalditik. Egiten dutena erabat apurtzailea da, arlo guztietan. Azkenaldian elektronika jorratzen dute gehienbat, beti soinuarekin jolasten. Jende gutxik daki Euskal Herrian horrelako musika egiten denik, agian bertan atzerrian baino oihartzun gutxiago duelako. Bertan egindako gauza bat hainbeste zabaltzea izugarria da. Edozein espresiobide aukeratzen dutela ere, beti saiatzen dira buelta bat gehiago ematen buruari, bere neurri egokian. Ertzera eramaten dute dena, guk bezala. Hortik dator diskoaren izena. Horrela oso zaila da nekatzea edo zeure burua errepikatzea.

Diskoa plastikozko poltsa batetan sartu duzue...

Lehen komentatzen nizunaren harira dator: zergatik ez egin zeozer apurtzailea? Zergatik ez plastikozko poltsa batetan sartu? Gainera, ez genuen konpaktuak sartzeko poltsa bat izaterik nahi. Liburuxka ere ez da ohikoa, abestiek hitz egingo balute bezala dago enfokatua. Agian hurrengoan formatu honekin nekatzen gara eta disko normala ateratzen dugu, ez dakigu. Guk bakarrik egin dugu, eta guk bezala beste edonork egin dezake. Zentzu horretan oso pozik gaude, bati gehiago eta beste bati gutxiago gustatuko zaio ideia, baina behitzat guk egin dugu. Demostratu nahi genuen ere ez dela hain zaila disko bat grabatzea: dirua apur bat lortu, grabatu eta bestea zeure kabuz egitea daukazu. Beste guztia (promozioa, eta blablabla...) gutxienekoa da.

Diskoetxeekin ez duzue traturik izan, ezta?

Ez, alde batetik ez genuelako denborarik galdu nahi. Gure filosofiaren baitan legoke hori ere: inertziaz egiten ditugun gauzak ez egitea. Inertziak esaten dizu kantuak grabatu ostean diskoetxeetara jo behar duzula, eta hauek ezetza ematen badizute, orduan ez zara ezer. Ba nik ez ditut gauzak horrela egin nahi. Arestian aipatutako punk jarrerarekin bat dator, punk jarrerak ez du duela hogei urte bezala janztea esan nahi, bakoitzak bere bidea egitea eta horrekin koherentea izatea, besterik ez.

2005, OTSAILA - MARTXOA
bidali zure elkarrizketak Bidali zure elkarrizketak
Bidali zure iruzkina


kaptxa

bai, ezagutzen dut datuen erabilpen politika eta onartu.

bai, entzunen buletina astero jaso nahi dut.