entzun.com

Musika albisteak
eta agenda astero
zure postontzian!


| Sindikatu - RSS | Testu tamaina AAA

Elkarrizketak

bidali zure elkarrizketak Bidali zure elkarrizketak
Myriam Garzia 2011-06-09

GOSE, arrosa koloreko ezpainen gose

Gose hirukoa. Gose hirukoa.

Klikatu argazkien gainean handiago ikusteko
Gorriaren urte eskas batera, argitaratu du Gosek bere lan berria, Arrosa (autoekoizpena, 2010). Ez da geldirik egon Arrasateko hirukotea, eta zentzu fisikoan diot, Japoniara ere eraman dien biraren barruan 50tik gora kontzertu eman baitituzte 2010eko lehen erdian. Arrosa kolorekoa, berria, hainbat lagun bilduta eta beraien laborategi eta lantoki duten Shot! estudioetara gonbidatuta grabatu dute. Bertan izan dira, Gari, Kutxi Romero, Fermin Muguruza, Petti, Mikel Urdangarin, Oskorriko lagunak, Oreka Tx, Naroa Gaintza, Miren Gaztaaga eta Ander Lipus, Makala, Pirritx eta Porrotx eta Josu Zabala. Gosekoak gustura aritu dira sukaldean, potentziometro artean, hori baitute leku natural. Bestetik, Goseren abesti dagoeneko ezagunenak aukeratu badituzte ere, abeslari bakoitzak bere ukitua eman dio eta, batzuetan, arras desberdinak suertatu dira. CD berria DVD batez lagunduta dator, On egin! dokumentala, kontzertu bat eta hainbat shot eta bideoklip biltzen ditu, Mikel Clementek hartutako irudiekin.

"Euskal Herrian eman ditugun kontzertuetan aldaketa sumatu dugu. Sinesgarritasun puntu bat irabazi dugula uste dugu. Lehenago txosnagune batean jotzen bagenuen jendeak ez zuen kasurik egiten. Bira honetan ordea, jendeak erantzun beroagoa eman digu"


Gorriarekin aritu zarete biraka hainbat tokitan, Euskal Herriaz gain Japonian, Kurdistanen, Madrilen, Bartzelonan... Nolakoa izan da bira hau?
Disko Gorriaren bira Japonian jotzen hasi genuen orain dela urtebete. Bertan kontzertuak eman ondoren argi geratu zitzaigun musikak ez duela mugarik, eta askotan gu geu garela mugak jartzen dituena. Ordutik hona 50 kontzertutik gora eskaini ditugu leku ezberdinetan, baina Euskal Herrian eman ditugun kontzertuetan nolabaiteko aldaketa sumatu dugu. Sinesgarritasun puntu bat irabazi dugula uste dugu. Lehenago txosnagune batean jotzen bagenuen jendeak ez zuen kasurik egiten edo harrituta begiratzen zigun. Bira honetan ordea, jendeak erantzun beroagoa eman digu, abestiak kantatuz, eta batzuetan dantzatuz ere... eta hori Euskal Herrian ez da gauza makala!!

Hala ere, bi urtetan bi disko argitaratzeko denbora izan duzue, produkzio mardula zeuena!
Japonera gurekin Mikel Clemente bideo errealizadorea eraman genuen. Berak han bildutako materialarekin dokumental bat egiteko material nahikoa zegoela esan zigun eta hor sortu zen DVD bat egitearen ideia. Azkenean disko honetan 13 kolaboratzaile daude, 12 musikalki parte hartu dutenak eta gero beste bat, Mikel, bere bideokamerarekin lan izugarria egin duena. Omenalditxo bat da lan hau, gure buruari egindako omenalditxoa.

Arrosa kolorekoa, eta hainbat kolaboratzaileen parte hartzearekin egin duzue. Nolakoa izan da kolaboratzaile hauen aukeraketa? Abestiek erabat diferente ematen dute.
Gure lagun gehienak musikariak dira edo musika munduarekin erlazionatuta daude. Beraz diskoa egiterako orduan nahiko erraza izan zen aukeraketa egitea. Proposamena luzatu genien eta denek baiezkoa eman ziguten!! Nortasun handiko artistak dira parte hartu duten denak, eta hori argi ikusten da emaitzan, bakoitzak bere ukitua eman dio abestiei.

DVDa eta CDa ale berdinean, zergatik opari hau?
Guretzako opari bat da gure lagunek egin diguten disko hau eta horregatik bagenekien ezin genuela saldu. Gainera gaur egun diskoak ez direla saltzen esaten denez, guk zuzenean diskoa oparitzen dugu eta kitto!!

Shot estudioa duzue laborategi eta lan toki. Nola egin duzue lan disko berri honetan?
Disko honetan, besteetan bezala ordenadorearen power botoia sakatuz hasi gara lanean. Oraingoan berriz, ez ditugu abesti berriak sortu baina gonbidatuak genituenez, estudioa goitik behera txukundu dugu, eta estudioko hotzgailua edari ezberdinez bete dugu gonbidatu ezberdinen nahiak asetzeko. Gonbidatuak dituzunean itxura ona eman behar da, bestela...

Nola banatuko duzue diskoa? Ohiko dendetan egongo da? La Chiquillaren inguruan lan talde bat eratu duzue, egun musika talde batek aurrera egiteko duen aukera bakarra da berak asmatzea merkatua?
Aurreko lana bezala, hau ere autoekoizpena da, hasieratik bukaerara guk ekoiztu dugu dena. Baina guk ez ditugu autoekoizpenak militantziagatik egiten, duintasunagatik baizik. Gustatuko litzaiguke gure abestietan sinisten duen diskoetxe bat aurkitzea, baina diskoetxeekin hitzegin dugunean negarrak besterik ez ditugu entzun. Industria krisian dagoen bitartean sortzaileok bide berriak topatu behar ditugu aurrera egiteko, eta horretarako fakturak nola egiten diren edota disko bakoitzari guk geu pegatinak jarri behar badizkiegu, ba aurrera!! Gainera gu herri kooperatibista batetik gatoz, eta horrek gauzak errazten dizkigu antolatzeko orduan. Hori bai, argi daukagu gure benetako lana kantu onak egitea dela. Bestalde Diskoa ez dugu ohiko dendetan banatuko. Gure webgunean eta zuzeneko emanaldietan salduko dugu.
bidali zure elkarrizketak Bidali zure elkarrizketak
Bidali zure iruzkina


kaptxa

bai, ezagutzen dut datuen erabilpen politika eta onartu.

bai, entzunen buletina astero jaso nahi dut.