entzun.com

Musika albisteak
eta agenda astero
zure postontzian!


| Sindikatu - RSS | Testu tamaina AAA

Elkarrizketak

bidali zure elkarrizketak Bidali zure elkarrizketak
Julen Azpitarte 2010-10-14

JOSEBA IRAZOKI / ON BENITO folk eta blues estiloak gaurkotzen

Joseba Irazoki zuzenean. Joseba Irazoki zuzenean.

Klikatu argazkien gainean handiago ikusteko
Joseba Irazoki Berako gitarra jotzaileak Euria ari du lan berria plazaratu du Moonpalace zigiluaren eskutik. Bertan, orain arte idatzi dituen kantu onenak bildu ditu, folk eta post-rock kutsuz bustiriko lan iradokitzailea gauzatuz. Era berean, On Benitok, Mikel Lertxundi bateria jotzailearekin eta Ibai Gogortza gitarra jotzailearekin osaturiko blues egitasmoa, bere bigarren lana argitaratu du. Oraingoan hirukote gisa eta aurreko laneko blues elektrikotik nabarmen aldenduz proposamen esperimentalago eta garaikideagoa bat gauzatzeko. Irazokirekin eta Lertxundirekin solastu gara bi lan interesgarri hauen nondik norakoen berri izateko.

Euria ari du lanarekin pozik?
Joseba Irazoki (JI): Nahiko kontent, buruan nuena nahiko ongi islatua gelditu dela uste dut, baita soinuren aldetik ere. Etxean grabatua dago eta estudioan azkar nahastua, baina emaitza nahiko ona da.


Diskoan jaso dituzun kantuak asko landu dituzula ematen du. Orain arte egin dituzun kantu onenak dira.
(JI): Bueno, eskerrik asko. Bertze diskoetan bezala egin dut lan gutti gotti betti, baina esperientzia gehiago daukat eta horrek zerikusia izan duela uste dut. Gero eta hobeki ezagutzen dut nire ahotsa eta abesteko modua, eta orokorrean ere gero eta argiago daukat zer lortu nahi dudan kantekin.


Oso musikari gutxirekin grabatu duzu diskoa, gehienetan zu eta bateria jolea. Horrela, pentsatuta zeneukan hasieratik?
(JI): Hasieran nik bakarrik grabatzea pentsatzen nuen eta konponketa hagitz gutxirekin. Gauza da Felix Buffekin nahiko jotzen ari naizela azken boladan eta diskoko kantaren bat dagoeneko zuzenean joa genuela. Behin grabatzen hasita eta konponketak etortzen zirela, garbi ikusi nuen kanta batzuk bateria behar zutela. Batzuei ere baxua sartu nien eta bukaeran soinu orokorra ikusita ia guztiei gehitu nien. Diskoko bertze soinuak gitarrak dira gehienbat, gustura ibiltzen naiz gauza desberdinak probatzen eta bilatzen.
Nolanahi ere, pieza instrumentaletara ere bueltatzen zara sarritan, esaterako Bashorentzat kantuan. Doinu instrumentaletan zure instrumentuarekin esploratzeko lurralde egokiak aurkitzen dituzu?


(JI): Gustura ibiltzen naiz pieza instrumentalak egiten. Ni izatez gitarrista naiz eta hor sentitzen naiz erosoen. Gainera, hor dago nire DO proiektua, non kanta guztiak instrumentalak diren. Disko honetan proiektu desberdinak nolabait elkartu egin direla uste dut.


Oso originala da zure musikan lortzen duzun azken emaitza. Folka, rock garaikidea, eta estilo klasikoa ere nahasten ditu, alegia, zure gitarrak batzuetan klasikoa ematen du.
(JI): Azken boladan folk zahar nahiko aditu dut, baita barroko musika pixka bat ere. Azkenean guzti hori gero zure musikan islatu egiten da, bertzela ere nahiko musika desberdina aditzen dut eta emaitza guzti horren nahasketa bat izaten ahal da.


Estilo aniztasun hori zure jarduera guztian nabaritzen da, hainbat proiektutan parte hartzen baituzu. Zergatik horrenbeste estilo eta soinu ezberdin jotzeko grina?
(JI): Erran dudan bezala musika hagitz desberdina entzutea gustatzen zait eta gero ere musika desberdina egitea da gorputzak eskatzen didana. Ez dut nire burua estilo batera mugatua ikusten. Batzuetan gauza gehiegi egiten ditudala pentsatzen dut, baina azkenean hori da gustatzen zaidana.


Egun, On Benito eta Atom Rhumba taldeetan jotzen duzu. Bi taldeak une berriak bizitzen ari dira: On Beniton hasieran jotzen zenuten soinutik nahikoa aldendu omen zarete, eta Atom Rhumban, berriz, izen eta ibilbide handiko rock banda batean aritzen zara. Nola ikusten duzu zeure burua bata eta bestean?
(JI): On Benitorekin disko berria prest dugu eta erran duzun bezala aldaketa handi xamarra egon da musikan, bluesa hor dago oraindik baina buelta bat ematen saiatu gara. Nik hasieratik nuen horrelako zerbait buruan eta pixkanaka hurbiltzen ari garela uste dut. Atom Rhumbarena, berriz, urteko sorpresa izan da niretzat, hagitz gustuko dut beraien musika eta proiektuan parte hartzea, hagitz pozgarria izan da. Oraingoz oso gustura gabiltza kanta berriak ateratzen eta nahiko ongi moldatzen ari da nire jotzeko modua taldera.


Ekoizle lanetan ere ibili zara Sexty Sexters taldearen azken lanean. Zer moduz esparru horretan?
(JI): Nire lehenengo esperientzia izan da eta nahiko kontent gelditu naiz, hala ere gauza aunitz jakin behar dira eta ez da erraza dena kontrolatzea. Gustatuko litzaidake horrelako lan gehiago egitea.


------------------------------------------------


On Benitori dagokionez, zer moduz lan berria?
Mikel Lertxundi (ML): Hagitz kontent gelditu gara egindakoarekin. Giro berezi batzuk sortu ditugulakoan gaude eta hori nahikoa da guretzako, ez dakigu zein harrera izango duen, baina emaitzak berezko balioa dauka guretzako. Oinarriak Mik estudioetan grabatu ditugu eta konponketak eta nahasketak lokalean bertan egin.


On Benitoren bigarren lan honetan ezberdintasunak nabarmenak dira, oraingoan blues elektrikoa gaurkotu egin duzuela esango nuke, esperimentatzeari ekin diozue, betiere blues sustraietatik aldendu gabe.
(ML): Lehenengo diskoa sinpleagoa baino zuzenagoa izan zen, gitarra, bateria, harmonika eta ahotsa soilik entzun zitezkeen, oraingoan berriz, instrumentu gehiago sartu ditugu eta egindako proba ezberdinak zabalagoak izan dira. Elkarrekin jotzen daramatzagun urteen ondorioz atera da aldaketa hau, baina emaitza beti da bera: bluesa.


Ibai (Borrokan) ere gehitu da taldera, zein ekarpen egin du? Estilo aldaketa horretan eraginik izan du? Zuzenekoetan nola moldatu da?
(ML): Asteko seriotasuna, kar, kar, zuzenekoetan erabiltzen genituen jantziak alde batera utzi ditugu-eta. Musikalki taldeari aldaketa ederra eman diola uste dugu, kantak zentzu gehiagorekin bukatuta daude eta elkarrekin asko ikasi dugulakoan gaude. Zuzenekoetan lasaitasun handia eman digu bioi; bikote izatetik hirukote izatera aldaketa nabarmena da.


Harritu egin nau Belatxa-n nola ausartu zareten esaterako Hound Dog Taylor-en blues elektrikoaren tradizioa eta Zuberoako kantu tradizionala uztartzen, eta atzetik kate horien soinuak, nola sortu zen kantu hau?
(ML): Abesti hau aurrera eramatea asko kosta zitzaigun, zalantzan geunden diskoan sartu ala ez. Ideia edo oinarria hasieratik egon da hor, baina leku horretara iristeko bidea luzea izan da. Aldaketa eta proba ezberdin asko izan ditu eta horietako bat Zuberoako ahotsak izan dira.


Bluesa eta euskal folklorea uztartzerakoan erreferenterik izan duzue buruan?
(ML): Kanta guztiak gure barrutik edo burutik aterakoak dira, ez dut uste erreferenterik izan dugunik abestiak egiterako orduan.


Nik nolanahi ere, Captain Beefheart-en itzala ikusten dut edo behintzat eredu moduan izan dezakezue, bluesa iraultzeari dagokionez.
(ML): Egia da kapitaina gustuko dugula.


Zuen proposamenean egin duzuen kalitate jauzi honen ondoren, On Benito benetako talde egonkor bihurtu da? Hasieran lagunen arteko egitasmoa zela ematen zuen, eta orain?
(ML): Egia da oraingo lan berri honek beste itxura bat duela eta egin ditugun abestiak landuxeagoak daudela, baina lagun arteko istorio gisa ikusten segitzen dugu. Ez dut uste gauzak asko aldatuko direnik, hirurok beste proiektu batzuk ditugu eta nahikoa lan izaten dugu astean behin entseatzeko.

v Eta zein izango da hurrengo urratsa?
(ML): Urteetan horrela jarraituz gero nik uste poztekoa izango dela, eta urratsak orduan ikusiko lirateke.
bidali zure elkarrizketak Bidali zure elkarrizketak
Bidali zure iruzkina


kaptxa

bai, ezagutzen dut datuen erabilpen politika eta onartu.

bai, entzunen buletina astero jaso nahi dut.