Kostata bada ere pasa den urtean, azkenik, estreinako lana era fisikoan aurkezteko aukera izan zenuten.
Bai noski. Grabazioa 2008ko abenduan hasi eta 2009ko urtarrilean bukatu genuen. Hasiera batean, gure asmoa martxorako edo apirilerako edukitzea zen. Tamalez, gauza hauek gehiegi atzeratzen dira hasiberriak garen taldeontzat. Bai diru faltarengatik, bai esperientzia gutxi edukitzeagatik... Gutxienez, masterra bukatutako urte berean kaleratu nahi genuen diskoa fisikoki, gure ilusioa ere ez makaltzeko. Zorionez, azken hilabeteetan, denon laguntzarekin eta Davis-i esker batez ere, aurrera atera dugu eta urtea oso pozik bukatu genuen.


Denbora hartu zenuten diskoa prestatzeko. Nola laburbildu egindako lana?
Duela pare bat urte, bi EP eta kontzertu mordoa eman eta gero, disko luze bat ateratzeko garaia iritsi zela iruditu zitzaigun. Aurrerantz pauso bat eman behar genuen. Gure lehenengo disko luzeak soinu ona edukitzea ere garrantzitsua iruditu zitzaigun eta horregatik deitu genion Santi Garciari. Urte oso bat itxaron izan behar genuen estudioa libre egon arte lanez gainezka baitabil urte osoan. Urte horren erdirako abesti guztiak konposatuta geneuzkan. Hurrengo hilabeteak abestiak guk geuk grabatzeko aprobetxatu genituen, gero estudiora sartzeko orduan gauzak argi edukitzeko eta denbora pixka bat soberan eduki genuenez, abestientzat efektuak eta kolaborazioak pentsatzeko aukera eduki genuen. Luzea izan da baina behintzat emaitzaz arro gaude.


Zergatik erabaki zenuten Kataluniara joatea grabatzera, zerk bultzatuta joan zineten?
Gezurra badirudi ere, ez ginen hango neska politengatik ezta