entzun.com

Musika albisteak
eta agenda astero
zure postontzian!


| Sindikatu - RSS | Testu tamaina AAA

Elkarrizketak

bidali zure elkarrizketak Bidali zure elkarrizketak
Julen Azpitarte 2011-06-11

MURSEGO “Perfekzioa ez dut maite”

Mursego: Argazkia: Ivan Montero. Mursego: Argazkia: Ivan Montero.
Lotura erlazionatuak
Mursegok (Maite Arroitajauregi txelo jotzailea) Bi (2) izenburuko lana argitaratu berri du. 2009an argitaratu zuen Bat (1) aurreko diskoak txundituta utzi zituen musika zaleak eta nahikoa oihartzun izan zuen hedabideetan. Grabazio horri esker, gainera, kontzertu andana eskaini zuen eibartarrak bai Euskal Herrian bai Estatuan. Orain, autoekoitziriko bigarren disko landuago batekin itzuli da, Bidehuts kolektiboaren laguntzarekin. Bertan askotariko doinuak bildu ditu, –bossa, folk, edo pop hotsak antzeman daitezke–, eta bere unibertso pertsonala osatzen duten erreferentzia, objektu eta pasioekin jantzi ditu, besteak beste, zinea, urpekaritza edota bideojoko retroak. Maiterekin solastatu gara lan iradokitzaile honen berri izateko.

Disko honetako kantuak landuagoak dira. Horrela atera dira ala zeuk zeure buruari jarri diozun erronka izan da?
Proiektu honekin hasi nintzenetik abesti berriak egiten joan naiz. Abesti batzuk urtebete daramate nirekin, beste batzuk, ordea, diskorako prestatu nituen. Bestalde argi neukan aurrekoarekin konparatuz disko landuagoa egin nahi nuela.


Azken emaitzan, buruan zeneukana islatu da?
Egia esan ez neukan argi zer nahi nuen ere. Abesti batzuk nire buruan entzuten nituen, baina beste batzuk estudioan bukatu ditugu. Pozik nago emaitzarekin, nahiz eta dakidan hobetu beharreko detailetxo asko daudela, dena den perfekzioa ez dut maite.

Kantuok landuagoak diren aldetik, zailagoak dira zuzenean jotzeko. Zelan moldatzen zara kantu berriekin agertokian?
Logikoki denak ezin ditut diskoan dauden moduan jo, baina abesti bakoitzaren esentzia jasotzen saiatzen naiz, zuzenerako moldatzeko orduan. Kantuak espresatu nahi dutena dira, nola edo hala jendeari helarazi nahi diodana. Abestiaren muina forma edo adierazteko moduaren gainetik egon behar da. Estudioan ere kontuan izan dugu kantuak gero zuzenean defendatu behar ditudala, diskoa eta zuzenekoa desberdinak izanda ere.

Oraingoan txeloaz gain beste instrumentu batzuek ere nahikoa presentzia daukate. Zeren arabera aukeratzen duzu instrumentua? Txeloarekin hasten dituzu beti kantuak?
Esperimentatzen hasten naiz. Etxean badut ikasteko gela, eta musika tresna eta tramankuluz beteta dago, erdi erdian beti txeloa egoten bada ere. Normalean ideia bat izaten dut eta tresna eta konbinazio desberdinekin frogak egiten ditut; beste batzuetan inprobisatzen nagoela zerbait ateratzen da eta ildo horretatik jotzen dut. Adibidez, Argia zara abestian, saguzarraren ultrasoinuak imitatu nahi nituen eta horretarako theremina erosi nuen interneten. Gehienetan abestiak berak eskatzen du instrumentazioa.


Diskoaren beste ezaugarri bat aniztasuna da, askotariko kantuak jasotzen dira. Zure gustuak ere horrelakoak dira? Musika estilo asko entzuten duzu?
Hala da, bai. Niretzat hori naturala da. Uste dut estilo desberdinak gustatzen zaizkidalako atera direla hain abesti desberdinak, esaten den bezala “aniztasunean dago gustua”, kar kar.


Deigarriak dira oso kantuen hitzak. Zure nortasunaren isla direla ematen du, apur bat xelebreak ere badira. Nola aukeratzen dituzu gaiak? Asko kostatzen zaizu idaztea?
Egia esan abesti erdiak Victor Iriartek idatzi ditu. Asko gustatzen zait nola idazten duen, oso modu pertsonalean, izugarrizko gustua dauka, kriston xarma. Esan dezakegu “enkarguz” egindako hitzak direla berak egindako gehienak: Iraganik gabeko emakumea, Mies vailla menneisyyttä (Un hombre sin pasado) filmari buruzko hitzak eskatu nizkion; Ende doinua diskoan jasotzen den guztiaren laburpena da; Argia zara, Låt den rätte komma in (Déjame entrar) filmari buruzko zerbait…
Zuretzat xelebreak direnak nik idatziko nituen: Microscopio, Itsas urpekarien antza, Donki kongu… Uste dut hitz gehienak direla nire izaeraren isla. Mila gauza kontatu ahal nizkizuke honen inguruan, baina denak pertsonalak. Pozik nago hitzekin. Abestiren bat kantatzea asko kostatzen zait, hitzen karga emozionala dela eta, hunkitu egiten naiz, zeharo.


Diskoak sinatzen ikusi zintugun Durangoko Azokan. Zelan ari da saltzen diskoa?
Itxura denez ezin gara kexatu. Zuzenekoetan gehiago saltzea espero dut, jarritako dirua berreskuratzea nahiko nuke. Batzuetan CDa kaleratzeak ez duela inongo zentzurik pentsatu ohi dut; ea hurrengoa biniloan egiteko aukera dudan.


Bi (2) Bidehuts zigiluarekin plazaratu duzu. Nolakoa da harremana kolektibo horrekin?
Aspaldiko lagunak dira eta hori garrantzitsua da; bestela promozio, saltze eta banaketa lanetan laguntzen ari dira. Diskoa nire kabuz egin nuen, asko ikasten da halakoetan, asko. Asanblada eta bazkariaren zain nago.


Laster film batzuen soinu banda egingo duzu zuzenean. Zer espero duzu? Horrelakorik egin duzu orain baino lehen? Zein beste proiektu duzu esku artean?
Horrelakoetan aritu izan naiz: Les ales del dimoni (laboratorium) filmarekin antzeko emanaldia egin nuen, edo Victor Iriarteren edo Jean Painlevéren filma laburretan ere musika egin dut, –azken hori Ibonrg-rekin batera–, dantza piezak ere musikatu ditut. Oso aberasgarria eta gozagarria da. Nola edo hala irudiez jabetzen zara. Nahi dituzun lekura bideratzen dituzu, lan prozesuan bizi izandakoa ikuslegoari emateko. Oraingo honetan film labur batzuk dira, amateurrak, 30eko eta 40ko hamarkadetan Kataluniako burgesiak egindakoak. Izugarriak dira. Iruñean izango da emanaldia Punto de vista zinema dokumentalari buruzko jaialdian.
Horretaz aparte, kontzertuak eta kontzertuak eskaini, eta beti esaten dudan moduan haurrentzako disko bat prestatzen hasi nahiko nuke, banabil zer edo zer lantzen: “Pupu eta Lorek lagunak behar dituzte koadrila osatzeko…”.
bidali zure elkarrizketak Bidali zure elkarrizketak
Bidali zure iruzkina


kaptxa

bai, ezagutzen dut datuen erabilpen politika eta onartu.

bai, entzunen buletina astero jaso nahi dut.