Bergarako hardcore taldeak disko berria, hirugarrena, plazaratu zuen 2010. urte ondarrean: Arnas bakoitzeko ernetzen, hamar kantuko lan mamitsua bai hitzei bai doinuei dagokienean. Ia 15 urte daramatza Fly Shitek ideiak eta doinuak zabaltzen hardcorearen eremuetan. "Zuk zeuk egin" filosofiari fidel, Euskal Herriko eszenaren talde beteranoenetako bat dugu.

Zona de Conflicto (Chesapik, 2011) dugu Granadako taldearen azken lana, hamaikagarrena dagoeneko. Ezer gutxi gehitu daiteke Lagartija Nick-i buruz: belaunez belaun mantendu den taldea dugu, nahiz eta askotan publikoak ez duen ondo ulertu honen bilakaera musikala eta honek ekarri du Lagartija Nick taldea (Jack Kerouac-en Bidean eleberriko pertsonaia baten izena) ez egotea beti merezi izan duen tokian.

Bilboko Mamba Beat taldeak bere hirugarren lanarekin datorkigu The (Part 1), Bartzelonako Tsunami Music zigiluaren eskutik. Elektronika ariketa librea, 2010 urtean zehar sarean jarritako singleak biltzen dituen EPak, bigarren atal indartsu baterako promesa iradokitzen du.

Bistakoa da. Musikariak dira musika salbatuko dutenak. Babesa izan edo ez, talde asko aurrera egiteko prest daude. Sormen lana zaindu eta erronka berrietan sinesten dute. Nafarroako KHOUS rock eta metal taldeak ere sinetsi du. Mugei erreparatu gabe etxean sorturikoa nazioartean landu dute, Loturak (Maldito Digital) emaitza etxekoei erakusteko. Burlata, Wiltshire, New York edo Ribe abentura ahaztezin baten geltokiak dira.