Bilboko Kafe Antzokiaren itxieraren egun gutxitara elkartu gara Gatibu taldeko Haimar Arejita (gitarrajolea) eta Alex Sarduirekin (ahotsa). “Tragu mingotsa” izan dela aipatu digu Haimar Arejitak, izan ere, urtarrilaren 10ean Kafe Antzokian izan behar zuen Gatibu taldearen zuzenekoa bertan behera geratu zen, aurresalmentako sarrera guztiak salduta egon arren. Kontzertu honen ordezkoa Barakaldoko Rock Star Live aretoan izango da datorren otsailaren 28an.

Iruñeko Karatekas taldeak 10 hazbeteko biniloarekin debutatu du. 50 eta 60. hamarkadetara jauzi egin eta soinu nahasketa dexentekoa gauzatu du: Bo Diddleytik Los Brincosera eta The Beatles-etik Vince Taylor-era. Cantabric records-ek argitaratu du diskoa.

Cockney Rejects oi! musikaren talderik esanguratsuenetako bat da eta, askoren ustez, mugimendu haren benetako sortzaileak, Garry Bushell kazetariarekin batera. Baina, etiketak etiketa, argi dagoena da punk kaletarraren sugarra bizirik mantentzen jakin zutela, 80etako hamarkadaren hasieran argitaratu zituzten disko miragarriekin, eta azken urteotan egiten dituzten zuzeneko indartsuekin.

Gora Japon bikoteak kalean du estreinako diskoa Bidehuts plataformaren eskutik. Myriam (bateria eta ahotsa) eta Jon (gitarra eta ahotsa) dira Gora Japon. Biek ala biek musikaren erritmoa, taupada, nabarmentzen dute euren jarioa azaltzerakoan. Agian, hortik dator diskoan antzeman daitekeen funk eragina. Hala ere, jazz, bossa, no wave, edo beste hamaika estiloren arrastoak suma daitezke.