entzun.com

Musika albisteak
eta agenda astero
zure postontzian!


| Sindikatu - RSS | Testu tamaina AAA

Elkarrizketak

bidali zure elkarrizketak Bidali zure elkarrizketak
2012-12-05

Ibon Rodriguez (Kafe Aleak liburuaren koordinatzailea) "Jendeak hartutako lanak eta sentimenduak gure aurreikuspen guztiak hautsi dituzte"

Liburuaren azala. Liburuaren azala.

Klikatu argazkien gainean handiago ikusteko
Kafea Aleak, 121 disko irakurketa liburuaren lehen edizioa agortu da. Baina, lasai, bigarren argitaraldia egin baitute. Guk Ibon Rodrigezengana liburuaren koordinatzailea Leire Lopezekin batera jo dugu argitalpen berezi honetaz gehiago jakin nahiez. Printzipioz, elkarrizketa hau Entzun! liburuan argitaratzeko egin zen, baina denbora faltagatik, azkenean kanpo geratu zen.

Kafe Aleak
liburuan 121 musikazalek eta ez musikarik idatzitako beste horrenbeste testu bildu dituzte, testu bakoitzaren ardatza disko bat delarik. Izenburuak argi iradokitzen du Kafea eta Galletak ekimeneko jendea dagoela  liburu honen atzean. Goazen bada, sustatzaileei, kasu honetan Iboni, hitza ematera.

Nola sortzen da eta zergatik disko hautatuekin liburu bat osatzeko ideia?
Kafea eta Galletaken ohiko formatuan musikariek soilik dute disko bat aukeratzeko modua. Guk, ordea, gogoa genuen guretzat inportantea den jendeari aukera hori emateko. Helburua, bakoitzak musikari begiratzeko duen modu pertsonala azalaraztea.

Nork hartu du parte?
Alde batetik publikoko jende "ezezaguna" dago, gure saioetara datozenak zein kontzertuetan urtetan ezagutu dugun hainbat pertsona. Bestetik, musikari izan gabe, musikarekin lotura estua duten pertsonak (soinu teknikariak, argi teknikariak, disko saltzaileak, disko argitaratzaileak, luthierrak, fanzine argitaratzaileak, musika kazetariak) edota kultura eta artearen inguruko pertsonak (marrazkilariak, eskultoreak, argazkilariak, idazleak eta filosofo edo pentsalariak).

"Musikalki sorpresa ederrak topatu ditugu. Baina hau ez da disko-katalogo bat, 'hil baino lehen derrigorrez entzun beharreko diskoen' zerrenda horietako bat"

"Zenbat buru hainbat aburu", dio esaerak. Imajinatzen dut askotarikoa eta oso heterogeneoa izan dela emaitza. Hala da?
Halaxe da, erabat heterogeneoa. Irakurleari hainbat testu gustatuko zaio, hainbat testu ez zaio gustatuko. Diskoekin gauza bera. Areago, gustatzen ez zaizkion diskoei buruzko testu ederrak topatuko ditu, eta alderantziz.

Badago esaterik ze estiloko diskoak eta zein garaitakoak diren nagusi?
Estilo askotako diskoak daude: musika klasikotik flamenkora, hardcoretik reggaera. Hala ere, hamarkadaka begiratuta, 90eko hamarkada da nagusi, baita 2000koa ere.

Nola antolatu dituzue disko iruzkinak? Zaharretik berrira? Alfabetikoki?
Irizpide bat bilatzen hasi ginenean erabaki genuen diskoaren argitalpen datari begiratzea, diskoa izatea ardatza. Honek gauza bitxirik ekarri du, adibidez, Bach-ena ez da lehenengo diskoa; idazleak aukeratu duen argitalpen bertsioaren datak atzerago kokatu du.

"Jende asko eta askorentzat argitaratzen duen lehenengo testua da"

Disko aukeraketaren bat harritu zaitu bereziki?
Disko aukeraketek baino, gehiago harritu gaitu testua lantzeko jendeak hartu duen lana, kontaketa zaintzeko gogoa. Kontuan izan jende asko eta askorentzat argitaratzen duen lehenengo testua dela.

Aukera izan duzu aukeratu diren disko guztiak entzuteko?
Bai, musikalki sorpresa ederrak topatu ditugu. Baina hau ez da disko-katalogo bat, "hil baino lehen derrigorrez entzun beharreko diskoen" zerrenda horietako bat. Parte hartzaileei eskatu genien idazteko aukera ematen dien disko bat aukeratzeko, abiapuntua izan zedin diskoa.

Behin lana amaituta eta liburuan iruzkin guztiak daudela, zer ondorioztatu duzu? Pozik emaitzarekin? Hasierako xedearekin bat egiten du azken emaitzak?
Bai, jendeak hartutako lanak eta sentimenduak gure aurreikuspen guztiak hautsi dituzte. Gainera denborarekin hasierako ideia moldatzen joan da eta, esaterako, testu bakoitzarentzat hiru lagun marrazkilarik azalaren interpretazio propioa egin dute. Horretaz gain, Copyleft filosofiari jarraitzeko, lizentzia hori duten argazki eta irudiak eskatu eta erabili ditugu soilik. Argazkilari guztiak inplikatu dira horretan ere.
Baina badugu, ordea, arantza bat. Emakumeak % 25 bat baino ez dira liburuan.

Non lortu daiteke liburua?
Liburuak eta diskoak maite dituzten guneetan, besteak beste Anti-, Power Records (Bilbo), Kaxilda, Beltza Records, Hontza (Donostia), La Hormiga Atmica eta Karrikiri (Iruea), Azkoitiko Mataderoan, Zarauzko Garoan, Algortako Eztabaida Gunean...
bidali zure elkarrizketak Bidali zure elkarrizketak
FITXA

Liburuaren izenburua: Kafe Aleak, 121 disko irakurketa
Editoriala: Kafe arrastoak
Orri kopurua: 272 (zuri beltzean)
Prezioa: 15 euro
www.kafeaetagalletak.net

Bidali zure iruzkina


kaptxa

bai, ezagutzen dut datuen erabilpen politika eta onartu.

bai, entzunen buletina astero jaso nahi dut.