entzun.com

Musika albisteak
eta agenda astero
zure postontzian!


| Sindikatu - RSS | Testu tamaina AAA

Elkarrizketak

bidali zure elkarrizketak Bidali zure elkarrizketak
Sagardantza 2015-10-06

Joseba Irazoki "Superhit-ak egiten ez ditudanez, jendea pixkanaka urbiltzen joan zaidala uste dut"

Joseba Irazoki eta Lagunak zuzenean. Argazkia: Juan G. Andrs. Joseba Irazoki eta Lagunak zuzenean. Argazkia: Juan G. Andrs.
Joseba Irazoki & Lagunak
Bakarka ikusi dugu, han-hemen bere gitarrari txinpartak ateratzen, baina orain lagunez ongi inguratuta datorkigu musikari nafarra. Felix Buff, Iban Urizar, Ager Isunza, Igor Telletxea, Jaime Nieto, Iigo Irazoki eta Johannes Buff-ekin batera disko mamitsua argitaratu du berriki, ausarta eta askea, eta ohi duen moduan errazkeriei keinurik egiten ez diona. Hipnotikoa da definizio hori gustatzen zaiola aitortu digu Josebak eta entzunaldiz entzunaldi, lakar edo leun, bizi edo intentsu, beti ere errepikakor  eta mila detailez josia, entzulearen gogoa harrapatzen joango da. Kontuz beraz, hemen baitira Joseba Irazoki & Lagunak, 2014ko diskorik interesgarrienetakoa atondu duen koadrila.
Oraindik zuzenean aurkezten ari den lan honetaz eta hamaika gauza gehiagoz hitz egiteko, Josebari galdera batzuk luzatu dizkiogu. Honatx:


Zure ibilbide musikaleko unerik goxoena bizitzen ari zara?
Ba oihartzunari dagokionez segur aski bai, musikalki uste dut esperientziak ere gauza on asko ematen ari dizkidala, beraz gustura nabil.

Zure ibilbideari begiratua botatzen badiogu, segur aski sortzaile eta interprete bezala erakutsi izan duzun eta erakusten jarraitzen duzun askatasuna, naturaltasuna eta konbentzionalismo eza azpimarratuko nituzke... Hala dakusazu zuk?
Ezaugarri horiek aipatu izan dizkidate bertze noizbait. Niretzako oinarrizkoa da musika egiten dudanean mugarik ez jartzea. Halere, zaila da nire burua definitzea. Lehen aipatu dudan bezala, pentsatu nahi dut urteak pasa ahala gauzak obeki egiteko gai naizela.

Sortzaile bezala, musikari ez diozu hesirik edo mugarik jarri. Folka, popa, esperimentazioa, rock and rolla, free-jazza... landu dituzu. Ordea, azken boladan rockaren baitan ikusten zaizu erosoen... Hala da?
Egia da Atom Rhumban hasi nintzenetik gehiago ibili naizela musika estilo horretan. Beti jorratu izan dut estilo hori, baina nire diskoetan agian ez da gehiegi islatu. Gaur egun gustura nago fazeta elektriko horretan, adina kontua ez ote den ere pentsatu izan dut. Etorkizunera begira ez dakit energia galtzen joanen naizen, beraz orain probestu beharra dut, jejeje.

Gauzak probatzea niretzako nahiko basikoa da (...) Nire ustez, mugak jartzea bidean gauzak galtzea litzateke

Joseba Irazokik mugarik du?
Ba pentsatu nahi dut ezetz, gauzak probatzea niretzako nahiko basikoa da. Edozein arte diziplinatan jarduteko beharrezkoa iruditzen zait. Nire ustez, mugak jartzea bidean gauzak galtzea litzateke.

Badira talentudun musikari bikainak halako batean ataskatzen direnak, errepikatzen direnak, sormena bukatu izan balitzaie bezala. Zein da zure formula gauza berriak edo desberdinak eskaintzen segitzeko?
Ez dakit, nire ustez oinarrizkoa da musika aunitz entzutea. Nik oso gauza desberdinak entzuten ditut eta gero kosta egiten zait bakarrik musika estilo batera mugatzea; edo nahiz eta musika estilo berdina egin beti jantzi berdinak jartzea.

Ez zara publiko masiboko musikaria. Hala ere, publiko zabal bat daukazu eta begirunea zor zaizula argi dago. Esango nuke salto handia eman zenuela rockeroek ezagutu zintuztenean...
Atom Rhumban sartzerakoan bultzadatxo bat nabaritu nuen oihartzun mailan. Halere, urteak pasa ahala entzule multzoa handitzea normala dela uste dut. Superhit-ak egiten ez ditudanez, jendea pixkanaka urbiltzen joan zaidala uste dut.

Hala ere, nik bederen gaurko Joseba Irazokiren parte bat lehen aldiko disko horietan zegoena egon badagoela esango nuke... Kantatzeko moduan, esperimentazio grinan, lehen aipatu dugun konbentzionalismotik ihes egiteko zera horretan...
Bai, uste dut musika egiterako orduan filosofia berdintsuarekin jarraitzen dudala. Kantak janzterakoan kolore desberdinak ematen saiatu naiz beti. Erranen nuke agian ahotsak ematen diola egindako gehienari horrelako lotura bat. Bertzalde, eta lehen erran dudan bezala, esperientziarekin gauzak obetzen joan naizela pentsatzen dut.

Oinarrizkoa da musika aunitz entzutea. Nik oso gauza desberdinak entzuten ditut eta gero kosta egiten zait bakarrik musika estilo batera mugatzea

Eta zer esaten ahal diguzu disko berriaz? Ez nuke hitz gutxitan definitzen jakingo...
Disko nahiko askea dela erran daiteke. Grabatzen hasi ginenean oso irekiak geunden edozer probatzera. Azken ukituak eman ditugunean bai egon da konposizio lan handiagoa eta buelta nahiko eman diegu konponketei. Jendeak hipnotikoa dela dio... Definizio ona izan daiteke. Nik argi nuen talde soinu bat nahi nuela. Kantak baino gehiago riff eta melodia batzuk aukeratu nituen. Hortik abiatu ginen soinu sendo eta atmosfera berezi bat lortu nahian.

2014ko Entzun! bilduman agertzen den Baso ertzean kantua aurkeztuko zeniguke?
Diskoko kantu aunitzetan gertatzen den bezala, oinarria esaldi errepikakor batean dago. Gero giro intentsu bat bilatu nahi izan dugu haustura momentu batekin. Hitzak dioen bezala, baso eta onddo artean horrelako bidai berezi bat edukitzeko kantua da.

Joseba Irazoki eta Lagunak. Nondik dator proiektua? Nola hasi zen eta nola iritsi zara honaino?
Orain dela bi urte Donostiako Lugaritz kultur etxetik proposamen bat jaso nuen musikari gehiagorekin kontzertu bat egiteko. Nahiko argi izan nuen norekin egin nahi nuen. Primeran atera zen dena eta konexio handia lortu genuen gure artean. Jende berdinarekin diskoa egin nahi nuela argi izan nuen. Denbora izan dugunean eta agendak bateratu ditugunean egin ahal izan dugu.

Bakarka ibiltzetik talde bat zuzentzera badago alderik, ezta?
Egia erran, nahiko erreza izan da. Musikari guztiek elkar ongi ezagutzen dugu eta musika mota berdintsua entzuten dugu. Gauza gutti aipatu behar izan ditut kantuak behar zuena lortu ahal izateko. Lan "astunena" agendak bateratzea izan da.

Zuzeneko aurkezpenak noiz eta nola izanen dira?
Denok hainbat proiektutan murgilduta gabiltza eta horren arabera ikusiko dugu zenbat egiten ditugun. Formazio berdina mantentzea da gure intentzioa. Nik uste aunitz ez direla izanen, baina egiten ditugunak bereziak izan daitezen nahiko genuke. Diskoko kantuez gain sorpresaren bat sartzea gustatuko litzaiguke.

Kantak baino gehiago riff eta melodia batzuk aukeratu nituen. Hortik abiatu ginen soinu sendo eta atmosfera berezi bat lortu nahian

Hitzei musikari bezainbeste garrantzia ematen diezu? Nola ikusten duzu zure burua letrista bezala?
Ezetz onartu behar dut. Normalki musika anglosaxoia entzuten dut eta ez diet hitzei gehiegi erreparatzen. Ez dut atal hori gehiegi landu nire ibilbidean eta letrak egitea kosta egiten zait. Normalean nahiago dut lagunengana jo, beraiek primeran egiten dute!

Zenbat ordu ematen dituzu entseatzen?
Boladak badira, baina 2-3 ordu egunean erranen nuke.

Eta musikaz bizi zara?
Azken urteetan bai. Aurten Nacho Vegas eta Duncan Dhurekin egon naiz biran eta ongi joan da. Hala jarraitzea espero dut!

Garai batean utzi zenion musikari profesionala izateari, baina azken boladan berriz ari zara. Beharrak bultzatuta?
Musikariaren bizitza gogor xamarra da, baina oso gustukoa dut. Utzi nuenean murgilduta nengoen proiektuek ez ninduten guztiz asetzen, nahiago nuen bakarrik gustuko musika egin eta dirua bertze leku batetik lortzea. Azken urtetan gehiago aukeratu ahal izan dut eta gustuko gauzak egin al izan ditut.


Oharra: Elkarrizketa hau Entzun! liburuaren 64. zenbakian argitaratu zen lehen aldiz.
bidali zure elkarrizketak Bidali zure elkarrizketak
DATOZEN KONTZERTUAK

  • Urriak 9
    JOSEBA IRAZOKI ETA LAGUNAK
    TOLOSA - Bonberenea
    + jupiter jon + nire
  • Azaroak 6
    JOSEBA IRAZOKI ETA LAGUNAK
    BERMEO - La Kapilla
    + jupiter jon
  • Azaroak 7
    JOSEBA IRAZOKI ETA LAGUNAK
    DONOSTIA - Intxaurrondo K.E.
    + the drones
  • Azaroak 13
    JOSEBA IRAZOKI one man band
    ZIBURU - La Factory
  • Azaroak 21
    JOSEBA IRAZOKI ETA LAGUNAK
    BEASAIN - Gaztetxea
    + l'ereu escampa
  • Azaroak 22
    JOSEBA IRAZOKI ETA LAGUNAK
    ZARAUTZ - Putzuzulo Gaztetxea
  • Azaroak 27
    JOSEBA IRAZOKI ETA LAGUNAK
    LEKUNBERRI - Kantina
  • Abenduak 3
    JOSEBA IRAZOKI ETA LAGUNAK
    BERRIZ - Kultur Etxea
  • Abenduak 26
    JOSEBA IRAZOKI ETA LAGUNAK
    BERA - Kataku

Bidali zure iruzkina


kaptxa

bai, ezagutzen dut datuen erabilpen politika eta onartu.

bai, entzunen buletina astero jaso nahi dut.