10 urte taldea sortu zenutenetik. Nola izaten ari da ospakizuna?
Egia esateko ez dugu ezer berezirik egin. Egia da zaila dela gu bezalako talde ttiki batek 10 urte irautea, eta ospatzeko moduko kontua dela. Baina esan dizudan bezala ez dugu ezer berezirik egin. Azkenean urtero egiten duguna egin dugu, kamixetak atera, Erratzun (gure herria) kontzertu bat egin...

Faxismoaren harra, zuen laugarren disko luzea da. Diskorik rockzaleena dela esan eta irakurri dugu. Nola dakusazue zuek?
Hala da bai, dudik gabe diskorik rockzaleena da. Ez dugu hori bereziki bilatu, baina inspirazioa hortik joan zitzaigun, eta egia esateko, oso oso pozik gaude emaitzarekin.

Faxismoaren harra da diskoaren izenburua eta izen bereko abestiaren izena. Denok izan dezakegu barruan har hori, ezta?
Bai noski, eta ez gure barruan soilik, zoritxarrez har hori oraindik ere gizartean zabaldurik dirau, eta ez bakarrik salatu, baizik eta borrokatu eta akatu behar dugun harra da.

Bi abesti desberdinetan jende jakin baten portaera gogor kritikatzen duzue: Ustela eta Ez gaituk jende bera. Sumintzen zaituen kontua da hori?
Guztiz sumintzen eta arduratzen gaituen gai bat da. Jende jakin batzuen faltsukeria, eta aurpegi bikoizketa hori, ez dugu ez ulertzen ezta onartzen ere. Horregatik Ez gaituk jende bera abestiaren izenburua, beraiek bezala ez garelakoz, eta gure etsaiak direlako.

 
Nola da posible 10 eurotan biniloa eta CDa batera saldu ahal izatea?
Gu ez gara honetatik bizi, eta gastuak betetzearekin eta benefizio pixar bat ateratzearekin konformatzen gara. Ez dugu jendearekin espekulatu nahi, kontuak atera genituen eta ikusi genuen tirada erdia salduz gero jarritakoa betetzen genuela. Horrekin konformatzen gara.

DDT-rekin kaleratu duze diskoa. Bilboko Gatazkagunea denda fisikoa itxi dute ordea. Zerbait aipatu nahi duzue honen inguruan?
Lehendabiziko gure esker handienak DDTko jende guztiari. Gure lau diskoak beraiekin zabaldu ditugu, eta lan benetan bikaina egin digute. Jakin genuen bai denda fisikoa itxi behar zutela, eta kristoren pena hartu genuen. Hala ere, dirudienez musika banaketarekin aurrera segitzeko asmoa dago. Gu hemendik gure animo eta besarkada handiena bidali nahi diegu. BIBA ZUEK!!!!!

Ze tirada egin duzue?
500 kopia atera ditugu, gu bezalako talde batendako nahikoa.

Non eskuratzen ahal da zuen diskoa?
Momentuz Baztanen, Intza, Ilargi, Txokoto eta Zubipunta tabernetan. Bera, Lesaka, Saran eta Donezteben, eta nola ez DDTren bidez. Oraindik ere Iruñerrian ere banatu behar ditugu, eta ea tarte batean mugitzen garen.


Bukatzeko, komentatzen ahal diguzue Baztango musika-giroa? Taldeak
daude? Kontzertuak? Mugimendurik? Eszenarik?
Orain dela bost bat urtetik honat zenbait talde sortzen hasi ziren, (Kalapite, Komando Kastaña, Aizkor erauntsiak, Zolda, Lapatine…), bainan zenbat arazorengatik talde hauek desagertzen joan dira. Pena bat da eta gu animatu nahi diegu aurrera segitzerat.
Bertze aldetik badirudi jende batzuen artean zeozer mugitzen ari dela, ea egia den eta talde berriak sortzen diren.
Kontzertuen aldetik, erran behar da Baztanek garai hobeak izan dituela. Gaur egun zenbait ostiraletan Zubipunta tabernan (Erratzu) kontzertuak antolatzen dira, baita Elizondoko Gaztetxean ere noizbehinka kontzerturen bat antolatzen dute. Hortik aparte, herrietako bestetan beti kontzerturen bat ikusteko aukera izaten da.
Bukatzeko, gure eskerrak eman nahi genizkieke, Oiartzungo Lezoti estudioei, baita bere teknikaria den Iñigo Kamposeri, gurekin arras ongi portatu zen, eta gizajoak aspirina bat baino gehiago hartu behar izan zuen, guk eragindako burukomina pasatzeko.