Forki kazetariak aurkezpen testuan dioen moduan, komunikabideetan lan egiten dugunoi asko gustatzen zaizkigu zerrendak egitea, ranking-ak, aukeraketak. Entzun! aldizkarian urtero bozkatzen ditugu gure disko kuttunak, musikariei zein adituei 10 kantu aukeratzeko eskatzen diegu, eta abar eta abar… Arrasateko udalak berriki argitaratu duen Musika Gida liburuxkaren kasua da. Hamar musikarik (gehienak euskal herritarrak) beste horrenbeste disko kuttun aukeratu dituzte. Anari, Coti, Evaristo, Fermin Muguruza, Benito Lertxundi, Ruper Ordorika, Ines Osinaga, Iñaki salvador, Carlos Tarque eta Gorka Urbizu dira aukeratzaileak. Besteengandik ikasteko edota kuriositate hutsaren plazerez gerturatzeko gida xumea da honako hau eta artisten aniztasuna kontutan hartuta, aukeratutako diskoen emaitza askotarikoa da inondik inora.