Disko honen estiloa izendatzeko garaian "askotarikoa" baino ezin izan dut jarri, oso zaila bait da Liz Harris-en musika lainotsuari izen bat ematea. Folk? Ambient? Noise? Shoegaze? Pop?... Ez bata ez bestea eta danetarik pixka bat. Era batera edo bestera Kranky diskoetxeak bere azken bi lanak CD bikoitzeko album moduan argitaratzean, ordu t'erdiz bere edertasun likidoaz gozatzeko aukera paregabea ematen digu.

Nolabait esateko, ganbara batean aurkitutako kasete edo gramofono zikin zahar batetik hartutako musika dirudi honek. Denboraren poderioz gastatuz eta hauts geruza baten azpian murgiltzen joan diren grabazioak eta pixkanaka jatorrizko soinutik aldentzen joan direnak, erabat ezberdina eta berria den beste zerbait sortuaz. Zentzu horretan, Leyland Kirby (The Caretaker) eta gaur eguneko hainbat artistek egiten dituzten soinu manipulazioekin parekatu daiteke. Baina, beharbada, erreferentzia hori urrutirago edo aintzinerago eramango nuke nik eta 90. hamarkadako Burial Hex, Cocteau Twins, Hood eta berez bereiziki eta oso gustoko ditudan Flying Saucer Attack-en ondoan jarriko nuke (horretaz ari garela, noizko azken hauen bidezko berrargitalpen bat?)
Alderapenak alderapen, Liz Harris-en ahots liluragarria da guzti honi zentzua eta nortasuna ematen diona eta benetan bere lana goraipatzeko arrazoia. Hortxe dago gakoa eta disko hauen misterioa. Eta bere hortan mantentzeko ez dut alderapenik egingo, zeuek aurkitu eta goza ezazue.

Grouper: "Alien Observer" by alteredzones