CBGB areto ezaguna itxi behar zutenean zabaldu zen zurrumurrua Bad Brains elkartu egin zirela. Mitikoak dira areto hartan 80. hamarkadaren hasieran eman zituzten kontzertuak (DVDan argitaratuak) eta azkeneko aldiz, hasiera batean, han jotzeko elkartu ziren. Tiroia aprobetxatuz, 2007an disko berria grabatu eta plazaratu zuten: Build a Nation. Betiko Bad Brains aurkituko dituzu disko berrian. Soinu berezi horrekin, hardcorearen ikono bihurtu dena eta reggae piezak tartekatzen dituena. Disko oso duina lortu dute nire ustez. Egia da HR ez dela bere garaian miretsi genuen bera. Taldearen energia ez da berdina inondik inora eta zuzenean, batez ere, faltan botako dugu aspaldiko HR hori. Hala ere, ezin da ahaztu 78tik martxan dagoen talde bati buruz ari garela eta adinean sartuta daudela. Ez da berdina Rolling Stone bat izatea edo Bad Brainseko kide izatea 60 urterekin! Agian taldearen jarraitzailea ez bazara, disko honek ez dizu asko esango, baina taldearen fanatikoei ez die kale egingo. Oroitzapen horiek! AdamYauchek (Beastie Boys) ekoiztu du lana.