Oraingoan bai. Porco Bravoren aurreko bi lanek, lau abestiko demoak (2004) eta 2009ko “Show!” izeneko CD-ak, punk rock basatiaren eta rock’n’roll grinatsuaren artean mugitzen zen talde baten berri ematen ziguten, baina lan estimagarriak baziren ere, taldekideak ez ziren haiekin guztiz gogobeterik gelditu. “Grooo!!!” honekin, ordea, (taldearen lehenengo disko ofiziala, taldekideek nahiago baitute aurreko bi lanak maketatzat hartzea) lortu egin dute. Turbonegroren zordun den sarrera baten ostean, txerri basatiek kartak mahai gainean jartzen dituzte: rock’n’roll zikin eta lizuna (“Lasciva”, “Motel”), rock eskandinaviarraren eskolan ikasitako lezioak (“Donante”), riff indartsuak (Pulpok eta Asier Indomablek “Electrica actitud” abestian egiten duten lana miresgarria da) eta, labur esanda, Porco Bravo lehenengo mailara eraman dezakeen disko bat. Orain arte, Porco Bravo ezagunak ziren inguru hauetan ikus daitekeen zuzenekorik onenetako baten jabe izateagatik. Hemendik aurrera, zaleek jakin ahal izango dute abesti ikaragarriak ere badituztela.