Atlantic River, Hau berua eta Ikaro diskoetako kantak, argitaratu gabe zeuden zenbait abesti eta Itoiz mitikoen garaiko Astelehen urdin baten (1978) kanta moldatu ditu Perezek Hiriko istorioak lan berrian. Noski, pop musikaz betea dago lan hau, JC Perezek bere ibilbidean erakutsi baitu pop abesti ia perfektua konposatzeko gai dela behin baino gehiagotan. Disko honetan berez maisuki sortutako abestiak jazz kutsuko moldeekin egokitu ditu. Horrela, berez aparta zena ikaragarri ona bihurtu du. Niri jatorrizko doinuak asko gustatzen zaizkit eta zuzenean estudioan grabaturiko moldaketa hauek ere berdin. Beharbada, disko honen alderdi bereizgarriena haize instrumentuek ematen dioten sonoritatea da: minimalista, ganbara musikatik gertu zenbaitetan, eta, kontraesankorra badirudi ere, guztiz soula.