Jetsex Paristik datorren hardcore talde gaztea da. Beno, ñabardurak egiten hasita, Paristik datoz baina abeslaria, Miko, euskalduna da, Bilbokoa hain zuzen; eta kide gehienak oso gazteak diren arren, duela pare bat urte hain gaztea ez den beste musikari bat batu zitzaien, Phil gitarra jotzailea, hamar urtez Burning Heads taldean aritutakoa (Frantziako Estatuko punk talderik ezagunenetako bat, zortzi bat disko kaleratu dituzte, horietako bi Epitaph diskoetxearekin). Eta hardcorea egiten dute, bai, baina ez gaur egun askok eta askok hardcoretzat daukatena; klasikoetatik edaten dute, eta euren proposamena Murphy’s Law, Bad Brains, H2O, Descendents ( Look abestia), Angry Samoans (Gas Chamber-en bertsio bat sartu dute) eta antzeko taldeen ildotik dator. Duela gutxi Euskal Herrian egon ziren jotzen 25 Ta Life taldearekin, eta oso zuzeneko fresko eta dibertigarria dutela ikusi genuen. Eskola zaharreko hardcorea gustuko baduzu, disko hau guztiz gomendagarria da. Info gehiago: www.theageofvenusrecords.com.