Seigarren zenbakira iritsi da jada Bilbon egiten den euskarazko punk eta hardcoreari buruzko argitarapen txukun hau. Eta inoiz baino erakargarriago dator, diseinu eta maketazio lanari begiratuta nahiz edukiei erreparatuta. Seigarren zenbaki honetan Poison Idea talde amerikanoa eta Bap!! andoaindarra dira plater nagusiak. Batetik, elkarrizketa luze eta mamitsu bat egiten zaio Jeerry A-ri eta horrez gain Poison Ideari buruzko erreportaje zabal bat gaineratu dute. Bap!!-i ere elkarrizketa luzea eta esanguratsua egiten diote, zeina argazki zahar estimagarriez lagunduta datorren. Gainontzeko platerak ez dira txarragoak: Riot/Clone, Brigada Criminal, Rubber City Rebels, Star Losers, Torazinas, Voetsek eta Real McKenzies taldeak; disko iruzkinak (Muletrain, Mundo Matadero, Eskorbuto, Minor Threat, Golpe de Estado, Deadline…), zuzeneko kontzertuen kronikak (Vulpess, Bilbao Harcore Bash Festival, Dead Generation…), albisteak, fanxine-gidatxoa… Lan polita dudarik gabe, harkoretek eta punk rockaren maitaleek biziki eskertuko dutena. Eta ez gara esaten aspertuko, genero hauetan espezializatutako euskarazko fanxine bakarra delako (guk dakigula behintzat).