Katrina urakanak sortutako hondamendiak batu zituen 2006. urtean Costello eta Toussaint (besteak beste) New Yorken kaltetuen alde egin zen kontzertu erraldoian. Geroago,
River in reverse diskoa plazaratu zuten biek, Toussaint-en abestien moldaketekin eta Costellorekin batera konposatutako kanta berriekin. Guzti hau DVDaren gehigarri moduan agertzen den elkarrizketan azaltzen dute bi musikariek. Disko hori aurkezteko biran emandako kontzertu bat jasotzen da hizpide dugun DVD honetan. 2006an Montrealen (Quebec) grabatu zuten bertako Jazz jaialdiaren barnean. Costellok bere ohiko Imposters taldea batu zuen eta Touissantek Crescent City Horns haize hirukotea bildu zuen emanaldirako. Emaitza guztiz gozagarria da: bi autoreen katalogoko abesti puskak jasotzen dira, Liverpoolekoaren alde rockzalea eta New Orleansekoaren rhythm&bluesa uztartuz. Pena da DVDak kontzertu osoa ez duela jasotzen leku faltagatik.