Leonard Cohen ospetsuari eginiko omenaldia da DVD hau. Musikari eta poetaren biografia eskaini beharrean, pertsonak berak eskaintzen duena iradokitzea izan da lan honen zuzendariaren asmoa. Horretarako, egitura bikoitza erabiltzen du: alde batetik, Leonard Cohen berari eginiko elkarrizketaren pasarteak agertzen zaizkigu; bestetik hainbat musikariek Cohenen kanta baten bertsioa zuzenean jotzen dute. Emaitza interesgarria da, filma borobila ez den arren. Hori diot, zeren eta, alde batetik, Cohenen esanak argigarri bezain txundigarriak izanik ere, bere pertsona eta obra ezagutzeko motz geratzen baita dokumentala. Bestalde, Sydneyn grabatutako zuzeneko kontzertuko emankizunetik, batzuen lana ederra izanik ere, esaterako Anthonyren (Anthony and The Johnsosn taldeko kantaria) interpretazioa edo Teddy Thompsonenena (niretzako guztietan hunkigarriena), beste zenbait musikariren bertsioak arrunt samarrak geratu dira, batez ere U2 taldearena. Hau, besteak ez bezala, estudioko gehiegizko produkzioarekin osatu dute. Edonola ere, Nick Cave, Rufus Wainwright, Martha Wainwright, Jarvis Cocker zein Beth Orton bezalako musikari entzutetsuek Cohen musikatzeko eginiko ahaleginak ikusteko une gozoak eskaintzen dizkigu.