Bai The Drones australiarrak bai The Black Lips estatubatuarrak, egun ikus eta entzun daitezkeen bi rock and roll banda onenetarikoak, eta era berean interesgarrienetarikoak dira (iruzkin hau sinatzen duenaren banda kuttunen artean daude): Antipodetakoek punk kutsu zikina duen blues zaratatsua jotzen dute; Atlantakoak berriz, munduko garage-rock koadrila onena da. Bi DVDak Madrilen grabatuta daude. Australiarren grabazioan kolorea zuri eta beltzarekin tartekatzen da eta kamera nahikotxorekin grabatuta dago.
Black Lipsena ere antzekoa da, kolore betean dator eta nik, egia esan, gehiago disfrutatu dut. Honetan, planoak zabalagoak dira eta musika, jakina, biziagoa eta parranda zaleagoa. Bata zein bestea ikustea merezi du bi banden kalitatea, bakoitza bere esparruan, itzela delako. Gainera, aparteko edukiekin ondo elikatuta datoz: diskografiak, argazkiak, klipak... DVD bilduma honekin aurrera jarraitzeko asmoa erakutsi dute Munster-eko arduradunek.