Blake eta Mortimer-en abenturen aitzindaritzat hartua izan da E.P. Jacobs-en Le rayon U (El rayo U gaztelaniaz; tamalez, euskaraz ez da existitzen) komikia. Hala ere, Alex Raymond-en Flash Gordon-ekin antzekotasun gehiago dituela diote adituek. Egia esateko, komiki honen ezaugarri bereziena hauxe da: tradizio amerikar klasikoaren eta franko belgiarraren uztarketa moduko bat da eta horrek bakarra egiten du.

Blake eta Mortimer-en polizia eta detektibe-abenturekin zerikusi gutxi dauka Le rayon U-k, baina jada Jacobsenen estiloaren hainbat ezaugarri agertzen dira bertan.
Argumentua fikzio-zientzian oinarritutako istorio bat da. Norlandiako gobernuak espedizio arriskutsu bat antolatu du uradium izeneko minerala bilatzeko. Uradiuma Uharte Beltzetan dago, non dinosaurioak, gizaki-tximinoak, suge erraldoiak eta fantasiazko beste animali batzuk bizi diren.

1943. urtean agertu zen Le Rayon U eta 2011. urtean berrargitaratu du Norma Editorial etxeak Estatu espainiarrean (ez da ordea gaztelaniaz agertzen den lehen aldia).