Dave Gibbons-ek komikigintzan duen fama ona aspaldian irabazi zuen. Medio honen historian maisulan eta eredu izan diren Watchmen (Alan Mooren gidoiarekin) eta Give Me Liberty (Frank Milleren gidoiarekin) marraztu izan ditu besteak beste. 2000 AD aldizkari mitikoan lehen aletik gaur egun arte hartu du parte eta DC argitaletxearen baitan mugitu izan diren ia super heroi guztiak pasa dira haren arkatzetik. Kasu honetan, Gibbonsek berak jorratutako marrazki eta gidoia ditugu mintzagai. Batek gogoak dituelako egiten dituen proiektu pertsonal horietako baten marka dauka Originals-ek. Musikarekin erlazio estuan dagoen munduan murgilduta, Gibbons-ek Quadrophenia pelikulan agertzen zitzaizkigun mod eta rockerrak hartu eta etorkizun urrun batean kokatu ditu iraganeko kutsua daukan istorio bat kontatzeko. Mod eta rockerren izenak aldatu egiten dira, eta baita Lambretta eta Harley motoenak ere (jada ez dute gurpilik, baizik eta airean labaintzen dira). Gidoia ez doa Quadrophenia pelikulatik oso urrun: bandek liskarrak dituzte, banda batek beste bateko kidea hil eta kristoa muntatu da; mendekua, polizia… eta tartean drogak eta emakumeak ere ageri dira protagonista gaztearen bizitzan. Horretaz gain, plazer handia da Gibbons bezalako maisu batek marraztu eta narratutako istorio bat irakurtzea.