entzun.com

Musika albisteak
eta agenda astero
zure postontzian!


| Sindikatu - RSS | Testu tamaina AAA

Kronika Zuzenak

bidali zure kritikak Bidali zure kritikak
Antton Iturbe 2015eko urriak 9 eta 10

Artium (Gasteiz) Mugako jaialdia 2015

Mugako jaialdiaren lehen edizioa. Argazkia: Ibai Salazar. Mugako jaialdiaren lehen edizioa. Argazkia: Ibai Salazar.

Klikatu argazkien gainean handiago ikusteko

Giro bikainarekin eman dio hasiera Mugako jaialdiak bere historiari. Antolaketa fina eta kalitatezko soinuaz gain, jende kopuru estimagarria biltzea lortu zuen joan den urriaren 9 eta 10ean.

Emanaldiak Artium eta Kubik aretoen artean banatu ziren, arratsalde/gauez lehenak eta goizeko ordu txikitara luzatuta bigarrenak. Arazo logistikoak direla eta (aitzaki dotore bat ematearren) Artiumeko emanaldietara mugatu nuen neure burua. Edonola ere, zer entzun, zer gozatu eta zer dantzatu franko aurkitu nuen bertan. Batez ere, zer dantzatu esango nuke, hori izan baita jaialdiaren kontzeptu nagusia. Antolatzaileek klub giroa lortzen saiatu ziren, baita lortu ere. Saio guztiak klub alorrera zuzendu ziren, dj sesioak, baxu indartsuak eta erritmo dantzagarriak nagusituz. Pertsonalki, pittin bat nekeza iruditu zitzaidan etengabeko matraka hori hainbeste ordutan jasatea, eta aurrerantzean jaialdiari jarraipena ematekotan, Artium barruko eszenatoki bat proposamen lasaiago eta esperimentalagoentzat uztea iradokiko nuke.
Kontuak kontu, hemen da estreinako edizio honi buruzko nire kontakizun txikia.

 

  • Ostirala 9

Guztira 4 saio ikusi nituen eta bi multzotan banatuko nituzke argi eta garbi. Lehenean Radithor eta Demdike Stare leudeke eta bigarrenean Boris Divider eta Answer Code Request.

Lehen multzoan giro misteriotsua eta puntu esoteriko zirragarria nagusitu zen, bigarrenean aldiz, fintasuna ez zen falta izan, baina funtzionaltasun techno pittin bat hotza ere bai.
Demdike Stare aspalditik jarraitu dut eta gogo handiz espero nuen Sean Canty eta Miles Whitaker-en emanaldia. Jaialdiaren izaerara moldatuz erritmora eta technora geruratu zuten saioa, baina pasarte ilun misteriotsuak, hain maisuki ehuntzen dituzten atmosfera deserosoak eta zarata zorrotzeko astinduak han eta hemen ederki banatu zituzten, orokorrean saio liluragarria bilduz.
Radithor bilbotarra ordea, ez nuen ezagutzen eta ezusteko galanta jaso nuen bere saioan, Mikel Laboaren ahotsa eta gitarra kakofonia elektronikoen artean zein modu dotorez uztartu zituen entzutean. Jarraitu beharreko artista zalantzarik gabe.

 

  • Larunbata 10
Aukera zabalagoa eta luzeagoa izan zen bigarren egunean eta nolabait crescendo baten moduan gogoratzen dut bertan entzun eta ikusitakoa.
Damian Scwartz
, Yngryd, Kastil & I-real, TM404 tenperatura pixkanaka igotzen joan ziren bere saioekin. 90ko hamarkadako Tresor diskoetxearen garai gorena gogorarazi zidaten une askoetan, Berlineko klub batera teletransportatuko bagintuzte bezala.

Giroa bere puntuan utzi zuten bada, Ron Morelli maisuaren saio itzelarentzat. Hau ere gogotsu espero nuen eta ez ninduen huts egin, ezta gutxiago ere. Ronek konplexu eta koartadarik gabe egokitu zuen bere proposamena. Punk-rave moduan izendatuko nuke bertan entzundakoa. Zuzena, sinplea, gozagarria, eragilea eta ikaragarri atxekigarria. Zolitasun eta abardurak diskoetarako gordetzen ditu Ronek, eta honelako saio baten ondoren primeran iruditzen zait niri.

Svrecaren saio argitsuak arnasa berreskuratzen lagundu zidan azken txanparako prestatu ahal izateko. Ron Morelli-rena punk izan bazen, Abdullah Rashimena death metal moduan izendatu beharko nuke. Bortitza, mamitsua, mingarria, errepikakorra, hipnotikoa eta astuna, oso astuna. Minutu batzuz aire fresko bila kanpora atera nintzela onartu behar dudan arren, ederki gozatu nuen orokorrean.

Amaitzeko Dasha Rush, Raster Noton zigilu ospetsuko azken fitxajeak, tonua baretu egin zuen pixka bat. Abdullah-ren ildoa erabat utzi gabe, kolore lisergikoko pintzelada bareen laguntzaz haren trinkotasuna desegiten saiatu zen, saio interesgarria borobilduz.

Klubeko musika elektronikoak badu bere lekua euskal jaialdien artean eta orokorrean oso nota onaz gainera. Ea urte askotarako den.

bidali zure kritikak Bidali zure kritikak
Bidali zure iruzkina


kaptxa

bai, ezagutzen dut datuen erabilpen politika eta onartu.

bai, entzunen buletina astero jaso nahi dut.