entzun.com

Musika albisteak
eta agenda astero
zure postontzian!


| Sindikatu - RSS | Testu tamaina AAA

Kronika Zuzenak

bidali zure kritikak Bidali zure kritikak
Urko Ansa 2016-1-29

B.E.C. (Barakaldo) Bryan Adams

Bryan Adams. Argazkia: Koldo Orue. Bryan Adams. Argazkia: Koldo Orue.

Klikatu argazkien gainean handiago ikusteko
Bere azken bisitatik hamarkada bat geroago, Kanadako musikariaren Euskal Herrirako itzulera garaipen totala izan zen. Zoratzear zeuden milaka pertsona, adin eta mota guzietakoak. Soinu garbia eta indartsua, dantzatzeko gogoa, eta 28 abesti; zuzenean burmuinera. 9.500 Ikusle bildu ziren BEC-en.



Gutxitan ikusi daiteke gisa honetako euforia kolektiboa: lehen abestitik (Do what ya gotta do) jendea zutik, saltoka, txaloka Izugarria izan zen. Azken diskoko kanta zen huraxe, baina jendeak ondo baino hobeto ezagutzen zuen. Cant stop this thing we started eta Shes only happy when shes dancing eromen horren isla izan ziren, baina azken horretan jendearen txaloek inpresio itzela egiten zuten: guztiok batera, txaloka erritmoa jarraitzen! Run to you klasikoa ere, bere gitarra bikoiztuekin, katarsi hutsa izan zen. Amaieran izan zituen txaloaldi eta oihuak edonor hunkitzeko modukoak izan ziren. Ez naiz inola ere jazotakoa puzten ari, nahi duenak youtuben sartu eta ikustea besterik ez dauka. Run to you amaitzean, Adamsen lehen hitzak: Hola. My name is Bryan and Im very happy to be back in Bilbao. Barakaldoko alkateari grazia handirik egingo ez zioten hitzak izan ziren, dudarik gabe, baina Bilboko udaletxeko eta bertaratu ziren Foru Aldundiko entxufatu guztiak pozik egoteko modukoa.

Beste abesti berri bat: Go down rockin. B.E.C.ek hartu duen inertziak geldiezina dirudi, eta zer arraio! Abesti berriak kristorenak dira! Momentu honetara arte bi jo zituen, eta gero gehiago etorriko ziren arren, segidan zetorren lau kantako zerrenda garai zaharretara begirakoa izan zen: Heaven, 80. hamarkadako piezarik politenetakoa, momentu magikoen testigu izan zen. Uste dut abesti honetan izan zela, Bryan Adams jaunak argiak itzaltzeko agindu eta jendeari mugikorren argiak martxan jartzeko esan zionean. Ez dakit imajinatu dezakezuen magia hori, B.E.C. moduko areto erraldoi bat, guztia ilargi txikiz osatutako argi zuriez jantzia, nota hunkigarri haiek eta Bryanen ahots urratua lagun zituztela. Eta gero, Kids wanna Rock mitikoarekin amildegian behera, rock and roll infernura zuzen zuzenean. Abiadura, gitarra zitalak, errepika gogoangarria Dena. Atabalaren kolpearen zain abestia gelditzen zen bakoitzean, eta gitarra solo zikinak kolpatzen gintuenean, aurreko kantak zioen zerua harrapatzen genuen. Pantailetan Back to the future film mitikoaren irudiak, eta amaitzean, atabal solo bikaina. Segidan, Its only love, baita ere deskriba ezina. Askok Tina Turnerrekin egin zuen bikoa gogoan izango duzue, baita nik ere, baina ez genuen, gau honetan behintzat, ia gogoratu ere egin. Eta hemen gitarra soloa oraindik hunkigarriagoa izan zen. Hori soinua! Garbi entzuten zen dena, atabalen kolpe guztiak bezala. Bilbao Exhibition Centre honetan entzun dudan soinurik onena izan du, agian, Bryan Adamsek. Eta oraindik zaharrago bat segidan, 1983ko This time hain zuzen ere. Ez zait sekula abesti hau gustatu, baina jendeak asko gozatu zuen.


Hori soinua! Garbi entzuten zen dena, atabalen kolpe guztiak bezala. Bilbao Exhibition Centre honetan entzun dudan soinurik onena izan du, agian, Bryan Adamsek
You belong to me, country kutsuko doinu berria, ia zaharrak bezainbeste kantatua izateaz gain, dantzatuenetakoa izan zen. Berriz ere polita izan zen jendeak dantza egiteko modua nola aldatzen zuen ikustea, gerria alde batera eta bestera mugitu eta txaloak emateari utzi gabe. Kanta honetako atabalen kolpeak apartekoak dira, abestiko onena, eta hori asko esatea da! Eta lehen bloke gaindiezinari amaiera emateko, Summer of69. Berriro ere zoriontasunez bustitako malkoak, eta show erraldoi batek behar dituen osagai tekniko eta emozional guztiak martxan. Era harrigarrian. 11 kanta iraun zuen irteera lehergarri honek askoren barruan, ni neu barne, iraungo du luzaroan, seguru aski betirako.

Segidan, erritmoa jaistea logikaren barruan zegoen arren, beherakada begi bistakoa izan zen. Gehiegizkoa, niretzat bederen. When youre gone entzutea egin beharreko sakrifiziotzat hartu nuen, eta (Everything I do) I do it for you berdin hartu nuen, nahiz eta ikuslegoa eztarria zarrastatu arte kantatzen ikusi. Balada eta abesti geldoen sortak dena hankaz gora jarri zuen, eta kosta egin zitzaion gero hasierako bultzada hori berreskuratzea. Lets make a night to remember, eta gero Here I am (bestalde, Ken Zazpiren Ilargia ezagunaren hasiera berdin berdina daukana) ez ziren aukerarik onena izan, batez ere aurreko bi baladen ondoren. Tartean sartutako blues jostagarriak (If ya wanna be bad ya gotta be good) ez zuen bere funtzioa guztiz bete, eta publikoko emakume bat dantzan jarri eta pantailan ikusgarri jartzen duenekoa (bira osoan egiten duen lez) niretzat soberan dago, baina tira, behintzat ez da Tommy Leeren Titty-cama bezain patetikoa.

Berriz ere Reckless disko mitikora egindako itzulera xumea (Somebody) beste balada batek (Ill always be right there) deuseztatu zuen. Eta azukre gaindosia borobiltzeko, Have you ever really loved a woman? Adams jauna nahastu egin zen, eta beherakada hau gehiegi luzatzen ari zen. Esan beharrik ez dago, horrek ikuslegoari bost axola ziola, eta horrela jarraituko balu ere ezin gusturago jarraituko lukeela.

Eskerrak Cuts like a knife etorri zela, erreskatera edo Bagenuen dezibelio eta distortsio beharra! Abesti horretan Bryan eta musikari guztiak bateriaren plataformaren gainean igo ziren. Ikusgarria, benetan, pantaila handietan eszena hori gozatzea, atzean ikuslego-masa izugarri bat zutela. 18 till I die errekuperazio horren beste pieza bat izan zen. Pantailetan 18 eta 55 zenbakiak ikusi genitzakeen. Bryan Adamsen adinaren zifra behar luke bigarrenak, baina oker ez banago morroiak dagoeneko 56 beteak ditu. Berdin dio, ez diogu agureari abestia izorratuko. The only thing that looks good on me is you dantzagarriarekin agurtu gintuzten, nigan sentsazio gazi-gozoak utziaz. Nolakoak izango ote ziren bisak?

Tira, denetik pixka bat. Beste kanta berri zoragarri bat (Brand new day), zirrara sortu zidana. Itzela! Eddie Cochranen Cmon everybody ere apartekoa izan zen. Kamerak ikuslegoaren lehen lerro osoa alde batetik bestera pasatzen zuen bitartean, jendearen keinuak eta dantzak ikus genitzakeen. Guztiak irribarrea ezpainetan zutela, mugimenduak abestiaren berezko dinamikotasuna ezin hobeto islatzen zuen. Soilik irudietan Sid Vicious motorra gidatzen ikustea falta genuen.

Eta amaitzeko, azken hiru kantak Bryanek berak bakarrik akustikoarekin (!) egin zituen. Baina nork arraio aholkatu ote dio hori egitea? Hainbeste kosta eta gero, showa berriro altxatzea justu-justu lortua zuenean, gisa honetako emanaldi bat akustikoan amaitzea?

Eta amaitzeko, azken hiru kantak Bryanek berak bakarrik akustikoare-
kin (!) egin zituen. Baina nork arraio aholkatu ote dio hori egitea?

Egia esan, She knows me, nahiko berria ere badena (2014koa hain zuzen), bikain gelditu zitzaion, bere ahotsaren erregistro aberatsak ezin hobeto erakutsi baitzituen, baina amaiera elektriko eta boteretsua espero nuen. Straight from the heart klasikoa ere sekulakoa da, baina testuinguru honetan ez hainbeste. Eta All for love zoragarria da. Zaila da, bera garaian bezala, alboan Sting eta Rod Stewart ez faltan sumatzea, baina akatsa akustikoan jotzea izan zen. Berriz ere mugikorrak piztu zituzten milaka pertsonek. Hunkigarria! Eta akabo. Horrelaxe joan zen Adams, 2 ordu eta 28 abestiko show intentsua eskaini ondoren.

Esan bezala, lehen 11 kantetan bizitutakoa deskribatzeko zaila izan zen: Zoriontasuna eta euforiaren paradisuan murgildu gintuen, baina gero nahastu zen Bryan. Ahotsez bikain nabaritu nuen, aparteko banda eta soinu itzela eskaintzeaz gain. Reckless diskoa, espero bezala, ia goitik behera errepasatu zuen. 7 abesti guztira, eta aurreko urtekoak, 1983koak, beste 3. Baina 5 berri ere entzun ahal izan genituen, eta horrek balio handia du. Espero dezagun kanadarra beste hamarkada bat pasa baino lehen itzultzea.


bidali zure kritikak Bidali zure kritikak
Bidali zure iruzkina


kaptxa

bai, ezagutzen dut datuen erabilpen politika eta onartu.

bai, entzunen buletina astero jaso nahi dut.