entzun.com

Musika albisteak
eta agenda astero
zure postontzian!


| Sindikatu - RSS | Testu tamaina AAA

Kronika Zuzenak

bidali zure kritikak Bidali zure kritikak
Urko Ansa 2015-3-21

Karmengo eliza (Markina-Xemein) Anne Etchegoyen

Anne Etchegoyen Markinan. Argazkia: Urko Ansa Anne Etchegoyen Markinan. Argazkia: Urko Ansa

Klikatu argazkien gainean handiago ikusteko
Kontzertu benetan berezia bizitu genuen Markinako Karmengo elizan igande arratsalde hartan. Korrika Kulturalaren barruan antolatua, Donapaleun jaio baina Frantzian famatu egin den neska honek daukan aparteko ahotsak guztiz liluratu gintuen.


Gainera, Markinako Xemein Abesbatza eta Emeki Korala izan zituen lagun: ikuskizuna bermatuta zegoen. Lehenik abesbatzak eta gero koralak bere momentua izan zuten, bakoitzak bi abesti interpretatu zituztenean. Bi kanta aipatzearren, Abesbatzak Benito Lertxundiren Baldorba kantaren bertsio zoragarri bat eskaini zigun, eta Koralak Itoizen Lau teilatu-ren beste bat. Bosgarren kantan atera zen Anne, bere bi musikariekin. Bertsio bikain asko eta abesti berriren bat edo beste geneuzkan zain, akaso bertsio gehiegi, baina ez dut uste inor esku hutsik irten zenik. Urkoren Guk euskaraz, Benitoren Loretxoa, Etxahunen Goizian argi hastian liluragarria, Urxo Zuriarekin elkartu zuena Aingeruen ahotsa entzun ahal izan genuen Elizara joaten ez garenok ere.

Aingeruen ahotsa entzun ahal izan genuen Elizara joaten ez garenok ere.

Goizian argi hastian/Urxo Zuria abestien elkartzearekin bat, kontzertuko momentu onenetariko batzuk bizitu genituen, Annek (oholtza gainean daukan berezko sena erakutsiaz) maisuki ikuslegoa zuzendu zuenean, lehenik ezker aldean zeudenak, eta gero eskuinaldekoak kantaraziz. Ondoren, emakumeak eta gizonak ere bereizi zituen. Esan genezake ia eliza osoak abestu zuela, eta horrek inpresio handia egiten du hain soinu ona daukan Karmengo Eliza honetan.

Emanaldi oso motza izan zen, batez ere protagonista bosgarren abestian sartu zela kontuan hartzen badugu, eta akaso pixka bat arina ere, abesti propio oso gutxi aurkeztu baitzituen. Bestalde, dena euskaraz kantatu zuen, eta adibidez, Pachamana, La terre mre, La Mer, Les Ftes de Maulon zerrendatik kanpo gelditu ziren, euskarazko beste batzuk bezala (Pilota partida bat, Eriko Festa e.a.). Argi dago dena euskara hutsez egin nahi zuela, eta Korrika kulturalak antolatutako kontzertu bat izanik, baliteke horrek ere eragin handia izatea.

Dena den, zoragarria izan zen bere ahotsak nola emeki notak laztantzen zituen entzutea. Mikel Laboaren Txoria txori (berak Hegoak deitzen dio), bere arrakastarik handienetakoa dena, ezin zen falta. Xabier Leteren Seaska kanta eta Xalbadorren heriotzean izan ziren beste bi momentu aipagarrienetakoak. Azken txanpan, Haurrak ikas zazue eta, nola ez, Eperra, Euskal Herri osoko edozein txokotan beti funtzionatzen duen pieza zoragarria. Berriro ere, jendeak abesten zuenean txunditzeko momentu gehiago bildu genituen.
Bis bakarra eskaini zigun, baina zoritxarrez Hegoak aukeratu zuen, bost abesti lehenago jo zuen berbera. Oso polita, dena den. Abesbatza, Koroa eta ikuslegoa txundituta nabaritu zitezkeen, Anne bera barne.

Azkenerako utzi ditut jo zituen bi abesti propio bakarrak. Izan ere, ez dakit zein puntutaraino konturatzen den abesti propioek daukaten balio erantsiaz, eta noraino iritsi daitekeen daukan talentu izugarri horrekin. Bataren hitzak Mixel Ducaurenak zirela azaldu zigun, kantu oso ederra, nahiz eta izenburua ez dakidan. Eta bigarrena ere berria, Lau haizetara (ez nahastu Imanolen izen bereko titulua duenarekin), benetan zoragarria. Horregatik diot, soilik 11 kantu abestu eta bere bi abesti bakarrik sartzea (eta gainera Hegoak bi aldiz jotzea) galera ere badela. Baina, nahiko segurola ibili bazen ere, benetan merezi izan zuen bertaratzeak. Lehen esan bezala, aingeruak ikusi baikenituen Baxenabarren jaiotako gazte talentudun honen eskutik.                .
bidali zure kritikak Bidali zure kritikak
Erlazionaturiko edukiak
Bidali zure iruzkina


kaptxa

bai, ezagutzen dut datuen erabilpen politika eta onartu.

bai, entzunen buletina astero jaso nahi dut.