Euskarazko liburugintzak oso gutxi jorratu duen esparrua betetzera dator Gaztelupeko Hotsak-ek aurkeztu berri duen Bosgarren haria izeneko liburu bilduma: musika popularraren baitako talde eta artisten inguruko biografiena, hain zuzen ere. Argitaratzaileen hitzetan, “bildumaren asmoa ez da tresna teoriko beldurgarriak sortzea, baizik eta, adituen eta zaletuen laguntzaz ikuspegi historiko-kritiko bat hartzea gure belarriek jaso dutenaz”. Liburuen formatua sakelakoa da eta lehendabiziko lanak hauexek: Jon Eskisabelen Itoiz, hari xingle bat; Gotzon Hermosillaren Ramones, familia maitagarria; Paddy rekalderen The Clash. Punk, rock’n’roll & reggae matxinada eta Asier Leozen Public Enemy. Beltzegi, indartsuegi. Liburuok irakurri ahala, horien iruzkina egiteko asmoa dugu atal honetan bertan. Ongietorri.