Kantutegia eta musikarekin lotutako liburuekin osatutako Paper Hotsak argitaldariaren liburu sorta berria eta interesgarria eskuragai duzue jada. Batetik, Bosgarren Haria sailak segida izan du hiru izenburu berrirekin: Joxi Ubedak BAP. Bai, ederki idatzi du, Xabi Bordak Jotakie, Urolan pop eta Jon Gurrutxagak Rory Gallagher, kemena eta leialtasuna. Liburu sail honetan, modu pertsonalean Euskal Herriko zein kanpoko musikariei buruz idatzitako testu biografikoak, kantuen letrak eta argazkiak jasotzen dira. Iaz martxan jarri zen sail honi Kajatxu Baltza izeneko argazki liburu sail berria gehitu behar zaio orain. Lehen lana Ikor Kotx, Rock & klick da, 160 orrialdetako argazki liburua, non Euskal Herrian egin diren kontzertuetako argazki bereziak jasotzen diren. Egilea, Jon Urbe prentsa argazkilaria da. Hitzaurreak Fermin Muguruza, Iker Barandiaran, Fernando Kuraia eta Txuriarenak dira. Eta bukatzeko, Txuma Murugarrenek Larrialdietarako irteera liburua osatu du. Kantari beteranoak diskoa eta musikari buruz idatzitako testuak. Literatura eta musika nahasten dira bertan.