Nontzeberri.com euskal webgunea, edo hobeki esanda, ataria dugu. Bere helburua kultura ahalik eta zentzu zabalenean jaso eta sarean zabaltzea da. Literatura, Ikus-entzunezkoak, Artea, Bertsotan, Musika eta Eszena dira webgune honen sei atal nagusiak. Horrez gain, Zeuk Sortu deritzon atala ere badago, non erabiltzaileei euren sorkuntza lanak plazaratzeko aukera ematen zaien. Izan ere, Nontzeberrikoen asmoa gune interaktibo bat lortzea da, non edozein motako sortze-lanak (eta edozein formatuan) lekurik izanen duten: Hitza, audioa, bideoa, argazkia, animazioa... edo zehatzago esanda: poemak, ipuin laburrak, argazkiak, net-artea, pinturak, bideo-lanak, bertsoak... Eta hori gutxi balitz, musika-foroak, bidaiak, inkestak, bilatzaileak, agenda… eta abar luze bat dira nabigatzailearen eskura ere. Nontzeberrikoek abisatzen dute: “Arrakasta, Operazioa, Zaborra... gogoko hitzak badituzu, hau ez da zure tokia. Honako gune honetan uste dugu kultura gauza ederra dela. Beste barik. Bestelako gehigarririk gabe”.