.:entzun.com:.

harpide


BIDEhUTS, 3. URTEA “hau ez da diskoetxe bat”
bIDEhUTS duela hiru urte eratu zen Bidasoaldean. Lisabören Ezlekuak lanak piztu zuen garra eta harrezkeroztik lan txukunak plazaratzen ari da.	3 urte bete ditu Bidehuts plataformak.
Egoitza Bidasoaldean duen bIDEhUTS kolektiboak uzta oparoa jaso du 2009 urtean. Izan ere, orain arte hamar erreferentzia plazaratu ditu eta horien erdiak aipatu urtean ikusi du argia, Irla Izan (Anari), A shake in calm water (Audience), Willis Drummond (Willis Drummond), Fosbury (Inoren Ero Ni) eta Gora Japon (Gora Japon), hain zuzen. bIDEhUTS duela hiru urte eratu zen Bidasoaldean. Lisabören Ezlekuak lanak piztu zuen garra eta harrezkeroztik lan txukunak plazaratzen ari da. “Lisabök bere lehendabiziko maketa argitaratu zuenean kopia bakoitzari azal ezberdin bat jarri zion, eskuz eginak zeuden, banan-banan egindakoak ziren. Espiritu horri helduta, baina hobetuta, alegia, bakar bakarrik ez egotearekin lotuta, elkartu eta laguntza eta ezagupenak partekatzen hasi ginen”, esan du Asier Zulueta kolektiboko kideak. Hala, Metak eta Esan Ozenki diskoetxeetan ibilitako zenbait taldek ikusi zuten bazegoela bide bat diskoetxe baten aritzetik aparte, bere gauzak argitaratzeko, eta produktua hobeto kudeatzeko eta kontrolatzeko hasieratik. “Lisabök Ezlekuak diskoa atera zuenean autoekoizpena egin zuen, baina Bidehutsen azpian, eta Bidehuts ez zegoen bakarrik, Lisabö, Inoren eta Anari ere baitan zeuden. Hortaz, talde horiek osatzen dituzten pertsonen laguntza jaso genuen”, azaldu du Eneko Aranzasti elkarteko kideak eta Lisaböko bateria jotzaileak. IZEN BAT Banda horietako taldekideek osatzen dute plataformaren muina. Eta plataforma hitza erabiltzen dugu elkarrizketatu ditugun bi kideek irmotasunez adierazten baitute bIDEhUTS ez dela diskoetxea: “Hau ez da diskoetxe bat, ezin dugu dirua jarri taldeak graba dezan, Bidehutsek ez dauka dirurik. Taldea da diskoa aurrera atera behar duena. Guretzako jarraibide nagusia autokoizpena da”. Hortaz, argi dago kolektiboaren jarduera autoekoizpenaren eta taldearen inguruan ardazten dela. “Taldeak ez badauka lan egiteko eta arriskatzeko gogorik, eta benetan pentsatzeko, diskoa berea dela, bIDEhUTSen ez dauka zereginik. Berak ez badu egiten, inork ez du egingo”, dio Zuluetak. Nolanahi ere, aurten izandako emaitzak ikusi eta gero, ematen du kolektiboak gero eta zigilu izaera gehiago hartu beharko duela. Izan ere, Anari gero eta publiko gehiago erakartzen ari da eta Audiencek jada landua du kanporako proiekzioa. Egoera horrek agian egitura profesionalago bat eskatuko du. “Nik uste dut bIDEhUTSek orain lortu duela izen bat, itxura bat. Lisabörena atera genuenean jendeak ez zuen Bidehuts ezagutzen, baina disko gehiago atera dugun heinean izena gehiago entzun da eta nik uste webguneak ere lagundu duela, eta, era berean, erreferentzia bihurtzen ari dela. Esaterako, AEBetako In The Red zigiluak talde berri bat ateratzen duenean bere webgunean begiratzen duzu diskoetxe hori erreferentzia delako, ba, nik uste, pixkana Bidehutsekin antzeko zerbait lortzen ari garela. Jendea interesatzen ari da”, nabarmendu du Aranzastik. bIDEhUTSen diskoen banaketa nagusia GORek egiten du, eta formatu eta tiradei dagokienez, binilozko diskoak plazaratzen ditu, “500 aleko tiradak”, eta CD kopurua, berriz, “aldatu egiten da taldearen arabera”. Horrez gain, Durangoko Azokan izan dira estreinakoz eta pozik daude jaso duten erantzunarekin. Etorkizunera begira ezer gutxi esan digute: “ez dakigu, ez daukagu inolako aurreikuspenik”, baieztatu du Aranzastik; “taldeak markatu behar du erritmoa”, gaineratu du Zuluetak. Izan ere, bIDEhUTSen kasuan taldeak egiten du zigilua eta ez alderantziz.
Julen Azpitarte

Documento sin título


BIDEhUTS, 3. URTEA “hau ez da diskoetxe bat”
bIDEhUTS duela hiru urte eratu zen Bidasoaldean. Lisabören Ezlekuak lanak piztu zuen garra eta harrezkeroztik lan txukunak plazaratzen ari da.


BIKE 3.0 non zinen zu 80ko hamarkadan?
Hirugarren diskoarekin datorkigu Bike kolektiboa (Bilbao Kolektibo Elektronikoa), Bike 3.0 izenekoa, aurreko Bike 1.0 eta Bike 2.0-ren ostean. Orain arte, haien asmoa Euskal Herrian elektronika egiten zuten taldeen abestien bildumak egitea izan bada ere, oraingoan RRV-aren hit klasikoen bertsio elektronikoak egitea eta ekoiztea erabaki dute. Ez arazorik gabe, 80. hamarkadan grabatutako magnetofoi zinta originalak lortzea ez baita gauza erreza izan, batzuetan ezinezkoa, lege arazoak medio edota hauetako asko desagertu direlako.


KRAKOVIA SOUND funk eta disko musika Polonia komunistan
70. hamarkadako hasieran, funk eta disko musikak arrakasta itzela izan zuen Polonia komunistan. Mendebaldeko erritmo hauek Baltiar kostaldetik sartu eta barru aldeko hirietan errotu ziren nagusiki. Krakovia izan zen Krakovia Zdrowy (Cracovia soinua) izeneko fenomeno honen epizentroa.


BORDER LINE Esperimentazioa eta punk jarrera
Musika doinu eta erritmoekin esperimentuak egitea atsegin dute. Bide berriak bilatzea. Jarrera hauslea da. “Punkia”, taldekideen hitzetan.


SOCIAL DISTORTION ahate itsusiaren parabola
“Guk ez dugu inoiz talde telonero txarrik izan. Beno, bai, Social Distortion”. Perla hori bota zutenak Sonic Youth izan ziren, eta beharbada bat baino gehiago harrituko da hori irakurrita. Gazteria Sonikoaren neska-mutilen harrokeria gorabehera, egia da garai batean, 80ko hamarkadan batez ere, Social Distortion bigarren mailako taldetzat jotzen zutela askok. Baina ezina ekinez egina: Social Distortionek oztopo asko gainditu behar izan ditu bere ibilbidean (heriotzak, espetxealdiak eta menpekotasunak tarteko), baina jakin du eskarmentu horretatik ikasten, talde bikaina bilakatu arte.


REIGNING SOUND Memphis rock’n’roll
Greg Cartwright (ahotsa/gitarra) musikari estatubatuarraren egungo egitasmoa da Reigning Sound. Aurretik, The Oblivians eta The Compulsive Gamblers taldeetan ibilitako musikaria bada ere, –guztiak garage-punk eszenako koadrilak–, banda honekin argitaratu ditu bere diskorik onenak. Izan ere, Reigning Soundek azken hamarkadan entzun diren rock’n’roll diskorik bikainenak grabatu dituela baiezta daiteke ezbairik gabe.

footer